Net ’n jaar nadat hy sy eerste treë in die Afrikaanse musiekbedryf gegee het, is JACOBUS besig om homself as een van die genre se opwindendste nuwe kunstenaars te vestig. Ná die wegholsukses van “Mila” keer dié talentvolle sanger, liedjieskrywer en opkomende wynmaker nou terug met “Verby Dans” – ’n vars liefdeslied wat beloof om nóg groter te wees.
JACOBUS het sy debuut in 2025 gemaak met “Gat In Jou Sak”, gevolg deur “Wag Dat Jy Terugkeer”. Hoewel die eerste twee vrystellings hom aan luisteraars bekendgestel het, was dit “Mila” wat sy loopbaan na nuwe hoogtes geneem het.
Dié liedjie het op die dag van vrystelling die nommer-een-posisie op Apple Music se Afrikaanse ranglys ingeneem en is steeds een van die platform se gewildste Afrikaanse liedjies. Daarby het “Mila” ook die nommer 13-posisie op Spotify se Viral 50 – South Africa-ranglys bereik – ’n prestasie wat JACOBUS se groeiende gewildheid bevestig.
Met “Verby Dans” bou hy voort op die moderne popklank waarmee hy reeds ’n sterk indruk gemaak het.
“‘Verby Dans’ is geskryf omdat ek ’n oomblik wou vasvang wat ek met iemand baie spesiaal gedeel het,” vertel JACOBUS. “Dit gaan oor verlief raak ná die eerste dans en alles wat daartoe aanleiding gee.”
Volgens hom was dit belangrik om die musikale identiteit wat mense op “Mila” leer ken het, verder uit te bou.
“Ek het baie gehou van ‘Mila’ se sound en ek dink ons wou daarby bly omdat dit vasvang wat ek na die musiekbedryf wil bring.”
Die eindresultaat is ’n ligte, aansteeklike popliedjie wat volgens hom gemaak is om mense saam te laat sing. “Ek hoop mense dans en luister lekker na die liedjie. Hierdie is een om by ’n braai te speel.”
Die musiekvideo is by Festa in Wellington verfilm. Hoewel die winterkoue behoorlik sy tande gewys het, sê JACOBUS die ervaring was een wat hy altyd sal onthou.
“Dit was ongelooflik koud, maar die span – met Ben Minnie as videograaf – was fantasties. Dit het die hele dag ongelooflik lekker gemaak. Ek is bitter opgewonde vir die wêreld om hierdie video te sien.”
Die video dra ook besondere persoonlike betekenis. Vir die eerste keer verskyn die vrou wat sy hart gesteel het saam met hom op die skerm. Sy eie meisie vertolk die hoofrol teenoor hom – gepas, aangesien die liedjie juis vir háár geskryf is.
“Dit was so spesiaal om daardie ervaring saam met haar te deel. Sy was ongelooflik in die video. Ons het basies net op ’n date gegaan terwyl ons afgeneem is. Dit was baie natuurlik en baie spesiaal. Hierdie liedjie is vir haar geskryf, so ek is baie bly sy kon ook deel wees van die video. Sy is net die beste.”
Met “Verby Dans” bewys JACOBUS dat die sukses van “Mila” geen toeval was nie. Sy unieke kombinasie van eerlike storievertelling, moderne Afrikaanse pop en opregte emosie maak hom ’n kunstenaar om dop te hou – en as die reaksie op sy vorige vrystelling enigiets is om op te gaan, kan “Verby Dans” heel moontlik sy grootste treffer nóg word.