Ruan Josh sal ná Vrydag op almal se lippe wees nadat sy eerste enkelsnit, Toevallig, die digitale-musiekwinkel, iTunes tref.
Die snit wat na verwagting 25 November vrygestel sou word is uitgestel na komende Vrydag, 2 Desember, maar dié sanger het nie op hom laat wag nie en ’n voorsmakie van die liedjie met sy aanhangers gedeel.
Klik hier om Toevallig op iTunes te voorafbestel.
Ruan Josh se debuut album Eggo word 24 Februarie 2017 vrygestel. Na meer as twee jaar in wording, is die aanvraag na sy debuut album groot. Die album sluit meer as 14 nuutgeskrewe liedjies in uit die pen van onder meer: Johan Oberholzer, Franja du Plessis, Rudi Claase en Juanita du Plessis.
Ruan is gebore as Ruan Joshua du Plessis en het besluit om onder die naam Ruan Josh te sing vanweë sy korporatiewe verantwoordelikhede as besigheidsman.
“Dis vir my twee verskillende wêrelde en wil hulle graag apart hou. Ek geniet albei ewe veel en voel ek wil nog baie gee in beide wêrelde,” verduidelik hy.
Ruan is die bekende sangeres, Juanita du Plessis, se seun. Haar dogter Franja volg ook in ma se spore en haar debuut-album het reeds goue status bereik.
Ruan het ’n B-Com Graad in Besigheids Bestuur en bekleë ook die algemene bestuurs pos in twee firmas naamlik WOW Music Distribution en Juanita Records.
“Musiek is soos asemhaal vir my, dis deel van my wese en ek glo musiek spreek oor alle grense heen. Dis hoekom ek net wil reis en by almal uitkom en my musiek deel. Ek kan nie wag nie.”