Chris Steyn is terug met nóg ’n enkelsnit wat beloof om luidkeels saamgesing te word. Sy splinternuwe vrystelling, “Dammit Ek’s Lief Vir Jou”, is nou beskikbaar en wys ’n nuwe, meer energieke kant van die gewilde sanger. Met ’n stewige dosis rock, pakkende kitare en ’n refrein wat moeilik uit jou kop verdwyn, is dié liedjie gemaak vir oop paaie, feeste en harde saamsing.
“Dammit Ek’s Lief Vir Jou” is ’n speelse, eerlike liefdesliedjie wat handel oor daardie oomblik wanneer almal rondom jou weet jy het uiteindelik die regte persoon ontmoet – selfs voordat jy dit self heeltemal besef.
“So ‘Dammit Ek’s Lief Vir Jou’ is ’n fun song. Dit is ’n bietjie meer rock as wat my vorige liedjies was, maar ek dink dit gaan vir die mense baie cool wees,” sê Chris.
Vir die skryf van die liedjie het Chris kragte saamgesnoer met die gewilde sanger en liedjieskrywer Riaan Benadé en sy eie dromspeler, Ruben Radyn. Die drie het ’n liedjie geskep wat lig op die oor is, maar steeds ’n opregte boodskap dra.
“Dit gaan maar net daaroor dat al die mense wat om jou is en jou goed ken, sal weet wanneer jy die regte een meisie gekry het.”
Die enkelsnit volg op sy vorige vrystelling, “Ek Kom Jou Haal”, wat vroeër vanjaar goed deur aanhangers ontvang is. Hoewel Chris se kenmerkende styl steeds duidelik hoorbaar is, bring “Dammit Ek’s Lief Vir Jou” ’n vars rock-invloed wat sy musikale veelsydigheid verder beklemtoon.
“Ek hoop hulle gaan dit geniet. Soos ek gesê het, dit is ’n bietjie anders as die vorige liedjies.”
Saam met die enkelsnit word ook ’n energieke musiekvideo uitgereik. Die video, wat deur Eric T. Graham en Tehan Buys vervaardig is, vang die spontane energie van Chris en sy orkes perfek vas.
Die video is by die gewilde Weiveld Village in Pretoria op die skaatsbaan en padelbane verfilm en het ’n moderne, punk-geïnspireerde aanslag. Deur slim kamerawerk word die gevoel geskep dat die kyker saam met Chris en sy band deur die dag beweeg, amper asof die hele video vanuit ’n “point of view” (POV)-perspektief afspeel.
“Ek en die band het ’n fun tyd gehad toe ons die video geskiet het.”
Met “Dammit Ek’s Lief Vir Jou” bewys Chris Steyn weer waarom hy een van die opwindendste jong stemme in Afrikaanse musiek is. Die liedjie kombineer eerlike lirieke, aansteeklike energie en ’n vars rock-klank wat nuwe én bestaande aanhangers beslis gaan laat kopskud.