Ná meer as twee dekades as een van Afrikaans se mees geliefde kunstenaars, keer Juanita du Plessis terug met haar splinternuwe album, “Hierdie Oomblik” – ’n besonder persoonlike versameling liedjies wat die verhaal vertel van haar lewe, ervarings en groei oor die afgelope ses jaar.
Met ’n indrukwekkende loopbaan wat reeds 17 ateljee-albums, meer as 3,5 miljoen albumverkope en meer as 400 miljoen stromings wêreldwyd insluit, bewys Juanita weereens waarom sy ’n vaste gunsteling onder musiekliefhebbers bly. Die nuwe album bevat 15 liedjies, waarvan nege splinternuwe snitte is en ses reeds bekende enkelsnitte wat oor die afgelope paar jaar vrygestel is.
Vir Juanita is “Hierdie Oomblik” veel meer as net nog ’n album. Dit is ’n weerspieëling van haar hart, haar geloof en die belangrikheid daarvan om die hier en nou te waardeer. Die meeste van die liedjies is deur haarself geskryf, met inspirasie wat direk uit haar eie lewe en persoonlike ervarings spruit.
“Ek het besef hoe belangrik elke oomblik in die lewe is en hoe waardevol die hier en nou werklik is. Hierdie album is my manier om daardie besef vas te vang,” vertel sy. “Musiek was nog altyd my manier om myself uit te druk. As mense my hart wil leer ken, sal hulle dit tussen die lirieke en melodieë van hierdie album vind.”
In ’n tyd waar die musiekbedryf toenemend op enkelsnitte fokus, het Juanita doelbewus besluit om weer ’n volledige album saam te stel. Vir haar is dit ’n manier om dankie te sê aan die lojale ondersteuners wat al vir meer as twintig jaar saam met haar hierdie musikale reis stap.
Aanhangers sal bekende treffers soos “Oulik Verby”, “Even If” en “Liewe Jinne” op die album vind, terwyl haar vertolkings van “The Candle” en “Angel of the Morning” nuwe dimensies aan hierdie geliefde liedjies gee. Met haar kenmerkende stem en emosionele vertolkings maak sy elke lied uniek, haar eie.
Liefde vorm die hart van die album en kom sterk na vore in liedjies soos “Hierdie Oomblik”, “Ons Heilige Plek” en “Ek Belowe”. Daarteenoor bring “Laaste Keer” ’n diep emosionele huldeblyk aan haar broer, Pieter Naudé, en bied dit vertroosting aan almal wat iemand spesiaal in hul lewens mis.
Juanita se speelse en energieke kant kry ook kans om te skitter op “Hey, Huganit”, ’n vrolike viering van vriendskap wat luisteraars ongetwyfeld sal laat glimlag. Vir diegene wat daarvan hou om die dansvloer vol te maak, is “Bly in Jou Baan” een van die album se groot kuier- en danssnitte.
“Ek is seker baie mense gaan hierdie lied nog hardop sing – dalk vir iemand in die verkeer, op sosiale media of sommer net vir die lekkerte!” lag Juanita.
Met produksie deur Franja du Plessis en Murray Lubbe, bied “Hierdie Oomblik” ’n moderne, maar tydlose klank wat die stories en emosies van elke lied perfek ondersteun. Die album neem luisteraars op ’n reis deur liefde, verlies, dankbaarheid, vreugde en die klein oomblikke wat die lewe betekenisvol maak.
Soos haar aanhangers haar al jare ken, bied Juanita met “Hierdie Oomblik” iets vir elke luisteraar – liedjies wat laat dans, laat droom, laat nadink en soms selfs ’n traan laat wegvee.
- “Hierdie Oomblik” is nou beskikbaar op alle digitale musiekplatforms. Fisiese CD’s en USB-weergawes is ook beskikbaar via Juanita se aanlynwinkel.