Met haar album “Klein Dingetjies”, wat verlede jaar uitgereik is, het Demi Lee Moore haar plek as een van die grootste name in Afrikaanse musiek verder versterk.
Sedertdien het Demi Lee se lewe ook op ’n persoonlike vlak verander. Benewens haar suksesvolle musiekloopbaan, het sy ’n nuwe en kosbare titel bygekry – dié van ma vir haar klein seuntjie.
Nou, byna ’n jaar ná haar laaste musiekvrystelling, is sy terug met ’n splinternuwe enkelsnit wat reeds die potensiaal het om een van die grootste liedjies van haar loopbaan te word.
“Daai Gevoel” is ’n energieke, opbouende liefdesliedjie wat deur die geliefde en ontslape liedjieskrywer Johan Oberholzer geskryf is. Dié liedjie dra besondere betekenis vir Demi Lee, wat jare lank met Johan bevriend was. Hy was ook die skrywer van haar deurbraakwenliedjie, “Mis Eet Slaap Herhaal”, waarmee sy die eerste seisoen van Die Kontrak gewen het.
“Dit is en sal altyd ’n voorreg bly om ’n liedjie uit Johan se pen te sing. Hy het net ’n manier gehad om met woorde te speel. Ek glo vas ek sou nie wees waar ek vandag is sonder Johan se liedjies nie. Hy het my so goed verstaan. Dis ’n voorreg om sy musiek te kan laat voortleef,” sê Demi Lee.
Met “Daai Gevoel” waag Demi Lee haarself doelbewus buite haar musikale gemaksone en verken sy nuwe klankelemente wat haar luisteraars moontlik nie van haar sou verwag nie.
“Ek voel dit is altyd nodig. Hoe gaan ’n mens ooit groei as jy nie buite jou gemaksone beweeg nie? Hoe gaan jy weet of daar meer is wat jy kan vermag?”
Die liedjie handel oor daardie onbeskryflike gevoel wat mense laat leef, glimlag en hulself vry laat voel. Hoewel die liedjie se kern oor liefde gaan, kan luisteraars hul eie betekenis daarin vind.
“Daai gevoel kan iemand wees, dit kan wees om te dans, om te sing, om net te leef sonder dat jy omgee wat mense dink. Dit kan ’n herinnering aan ’n goeie vakansie wees, dit kan ’n liedjie wees – dit kan enigiets wees,” verduidelik sy.
Die boodskap wat sy met die liedjie wil oordra, is eenvoudig maar kragtig:
“Ek hoop mense laat hulself toe om bietjie buite die boks te doen en te dink en nie hulself te briek deur vrees of onsekerheid nie. Doen dit net! En ek hoop hulle gaan lekker dans.”
Die vrystelling word vergesel deur ’n indrukwekkende musiekvideo waarin Demi Lee vir die eerste keer haar dansskoene aantrek. Sy deel die skerm met die professionele danser Jac-Louis Snyman, iets wat aanhangers nog nooit van haar gesien het nie.
“Ek het nooit in my lewe gedink ek sou dans nie en hier dans ek tog te lekker! Ek dink as ’n nuwe ma het ek net gevoel ek wil die beste weergawe van myself word, en deur dit myself druk om dinge buite die boks te doen.”
Die produksie van die musiekvideo was geen geringe taak nie. Die opname het oor byna vier-en-twintig uur gestrek en is op drie verskillende stelle verfilm. Ten spyte van die lang ure, koue toestande en fisiese uitdagings, beskryf Demi Lee dit as een van die mees vervullende ervarings van haar loopbaan.
“Dit was die beste ervaring. Dit was moeilik en dit was baie lang ure. Ons was in pyn en het so koud gekry, maar absoluut elke bietjie was die moeite werd. Die danser Jac-Louis was só gaaf en het my so mooi gehelp en regtig net ’n wonderlike energie na die stel gebring.”
Die choreografie vir die video is behartig deur Keenan, dieselfde choreograaf en vriend wat verantwoordelik was vir die ‘viral’ dansroetine in Demi Lee se musiekvideo vir “Hart Breek”.
Met ’n vars klank, ’n inspirerende boodskap en ’n visueel indrukwekkende musiekvideo, wys Demi Lee Moore weereens waarom sy een van die mees geliefde en dinamiese kunstenaars in die Afrikaanse musiekbedryf is.