Loftus Versfeld het op 30 Augustus weer geblink toe die immergewilde Krone-konsert duisende musiekliefhebbers saamgetrek het vir ’n aand vol ritme, nostalgie en kragdadige saamgesang. Vir die derde agtereenvolgende jaar was die geliefde mediapersoonlikheid Charmaine agter-die-skerms en in die hart van die aksie – en sy het dit weereens onvergeetlik gemaak.
Nog voor die eerste noot gespeel is, het Charmaine ’n eksklusiewe kykie gekry na die indrukwekkende 360-grade verhoog en met die Krone-span gesels oor die besonderse beplanning agter die vertoning. Haar passie en toewyding om die Afrikaanse musiekbedryf te ondersteun, stel haar telkens in staat om nie net die kunstenaars nie, maar ook die unieke gees van die geleentheid vas te vang.
Tydens die konsert en selfs agter die verhoog het sy met talle van die grootste name in die Afrikaanse musiek gesels, waaronder Juanita du Plessis, Liezel Pieters, Brendan Peyper, Snotkop en vele meer. By die Kuiertuin het sy ook tyd spandeer saam met die kunstenaars wat die gehoor opgewarm het, wat haar verslaggewing nóg meer persoonlik en lewendig gemaak het.
Maar Charmaine se ervaring was nie net beperk tot die verhoog en die sterre nie – sy het ook deur die stalletjies beweeg, met konsertgangers gesels en die ware polsslag van die aand vasgevang. Haar aansteeklike entoesiasme het gesorg dat haar volgelinge die Krone deur haar oë kon beleef.
Een van die groot hoogtepunte van die aand was die spesiale huldeblyk aan Kurt Darren, wat deur sy vrou Dunay en hul kinders op die verhoog bygestaan is – ’n oomblik wat die gehoor diep geraak het.
Charmaine het ook erkenning gegee aan Jess van Cilyca Aesthetics, wat haar ondersteun op haar reis na gesonde vel. “Die CO2 Fraktale behandeling wat ek net na Krone 2025 ontvang het, het my gehelp om my beste self te wees,” het sy vertel.
Met drie jaar van Krone-ervarings agter haar, het Charmaine haar plek as stem en gesig van Afrikaanse musieknostalgie en vermaak bevestig. Haar teenwoordigheid beklemtoon nie net haar toewyding aan die kuns en kunstenaars nie, maar ook die hegte band wat sy met gehore bou.
Krone 2025 sal onthou word as ’n aand van musiek, samehorigheid en onvergeetlike herinneringe. Soos altyd, was dit ’n massiewe saam-sing jol – en Charmaine sien met groot opgewondenheid uit na die volgende jaar se vertoning.