Danny Smoke is ’n gerekende vervaardiger en het veral bekendheid verwerf vir sy fenomenale kitaarspel. Daar is omtrent nie ’n verhoog in die land waarop hy nog nie opgteree het nie en agter die skerms was hy betrokke by die vervaardiging van die grootste treffers en sterre se musiek in Suid-Afrika!
Ná die suksesvolle vrystelling van sy enkelsnit Wie’s Jou Kat in 2022 stof Danny nou sy kitaar af vir ’n splinternuwe enkelsnit – Stadig.
Dié enkelsnit uit Danny se pen vang daardie oomblik vas van twee mense wat in tyd “stadig” asem haal terwyl hul harte saam vinniger klop. Twee sielsgenote wat mekaar gevind het en die gevoel goed ken.
“Dit is ’n love song, maar ook uitdagend. Ek hou daarvan om in die moment te lewe, en dit was my inspirasie om dié song te skryf,” het Danny gesê.
Stadig is vervaardig deur die gerekende vervaardiger Murray Lubbe van The Hit Factory. Hierdie ateljee het treffers vir Brendan Peyper en Appel opgelewer.
“Ek probeer al hoe meer real wees in my musiek en wil hê mense moet ervaar hoe lief ek dit het! My klank verander elke keer ’n bietjie, en dis exciting vir my,” het Danny gesê.
Danny kom uit ’n musikale familie en musiek was reeds van kindsbeen af deel van sy lewe. Volgens die musikant inspireer enigiemand met musiektalent wat die bedryf bevorder hom.
“Musiek gaan slegs oor emosies en hoe om dit te ontlok. Ek skryf musiek soos wat ek op die spesifieke dag voel.”
Die musiekbedryf het hom geleer dat jy as musikant na jouself moet omsien en die verhoudings wat jy bou moet op pas. Hy het ook geleer dat dit veel meer as musiektalent verg om sukses in die bedryf te behaal.
Danny is op die Aitsa-musiektoekennings met die prys vir beste vervaardiger vereer en is vanjaar ook benoem vir liedjieskrywer van die jaar vir Jo Black en Refentse se treffersnit Rig Jou Oë Na die Berge.
Danny se debuutalbum Swaeltjies is benoem vir ’n SAMA (South African Music Award) en verskeie van die albums wat hy vir ander kunstenaars vervaardig het, is al vir dié gesogte toekennings benoem.
LEES OOK: Danny Smoke trek aandag met eerste enkelsnit
Sy musiekvideo vir die liedjie Jou Lippe het byna 3 miljoen kykbeurte op YouTube en hy het onlangs vir die eerste keer in Australië en in Nieu-Seeland getoer met sy eie vertoning.
Danny droom daarvan om die land se grootste kunstenaar te word en om sy eie musiek op die Afrikaans is Groot-verhoog te sing.
Hy sonder sy optrede by die Country Music Awards in Nashville, Tennessee in die VSA, uit as een van die hoogtepunte in sy loopbaan.
As hy nie ’n musikant was nie, sou hy ’n mode-ontwerper of ’n professionele jagter wou wees. “Of ’n rolprentster,” skerts hy.
- Stadig is nóú beskikbaar op alle digitale stroomdienste soos Apple Music, Spotify, Deezer en YouTube Music.