Ons vat vyf met die manne van Victor Bravo

FOTO: Verskaf

Victor Bravo se jongste enkelsnit is onlangs vrygestel – en Fanie Nel het vyf gevat met dié manne! 

LEES OOK: Duo, Victor Bravo, vier hul herkoms met nuwe enkelsnit

Vertel ons meer van jul nuwe enkelsnit. 

Weco: Suiderkruis is ’n kontemporêre popsnit. Dit is deur my geskryf en Jopie het die akoestiese en elektriese kitaarwerk gedoen. Die liedjie is vervaardig deur Renier Henning Music en sluit die werk van bekende dromspeler, Bruce Wallace, en baskitaarspeler, Janes Blomerus, in. Basies gaan dit oor Suid-Afrika en hoe baie jy daarna verlang wanneer jy nie hier is nie… al probeer jy jouself soms anders oortuig. Ek het dit eerstehands ervaar toe ek vir drie jaar in Amerika ‘groener weivelde’ gaan soek het. Jy bly ’n Suid-Afrikaner in murg-en-been. Rugby, braaivleis, en ons taal vloei deur jou are en ’n deel van jou gaan altyd daarna verlang.

Jopie: Dis ’n liedjie wat gaan oor wegdwaal na ’n ander land en weg van die huis af, soos wat baie Suid-Afrikaners maar doen. Die klem lê egter in die feit dat niks anders ooit soos die huis sal voel nie en dat jy altyd sal weet waarheen om na terug te keer.

Wat is die waardevolste les wat die inperking julle geleer het?

Weco: Dat jy nie moet uitstel as jy iets wil doen of iemand wil sien nie, want môre mag dalk baie anders uitdraai as wat jy gedink het. ’n Mens moenie net alles as vanselfsprekend ervaar nie.

Jopie: Dat ons nie altyd die waarde in die klein, alledaagse interaskies raaksien en besef hoe belangrik dit vir ons psige is nie. 

Watter boodskap wil julle met julle musiek oordra?

Weco: Almal van ons se omstandighede verskil en daarom heg elkeen verskillende waarde aan lirieke. Ons musiek moet wees watookal die luisteraar nodig het dit moet wees op daardie spesifieke oomblik wat hulle dit hoor. Dit moet jet fuel wees vir die ouens wat wil kuier en dit geniet, maar dit moet ook ’n sagte vertroosting wees vir enigiemand wat op daardie oomblik ’n skouer soek om op te huil.

Jopie: Ek dink nie het ons het een vaste boodskap wat ons kan opsom nie, omdat ons liedjies so baie van mekaar verskil. So vir my is die boodskap wat ons oordra watookal luisteraars daaruit kan vat. 

Beskryf die groep in ’n neutedop.

Weco: Die projek, Victor Bravo, is so drie jaar terug gebore as ’n konsep in my kop. Die idee was om ’n platform te skep uitsluitlik vir musiek, sonder die ander sideshows. Om terug te gaan na hoe musiek was toe daar nie veel meer as lewendige vertonings en basiese opnames was nie. In ons wildste drome, het ons nie verwag dat gehore dit so baie sou geniet, of dat dit tot vele optredes sou lei nie. Ons is ’n akoestiese duo wat musiek maak wat met die hart praat – hetsy dit deur middel van ons oorspronklike liedjies of ons weergawe van bestaande werke is. Omdat ons albei ‘ou siele’ is wanneer dit by musiek kom en versot is op blues, is daar altyd elemente daarvan in ons musiek teenwoordig.

Jopie: Ons is twee rustige musiekliefhebbers, wat op die einde van die dag net musiek wil maak wat ons geniet. 

Watter toekomsdrome het julle? 

Weco: Ons wil graag aanhou om ons musiek met gehore te deel en te doen waarvoor ons lief is. Tans is ons besig om die inhoud vir ons eerste vollengte album te finaliseer en om aan nuwe materiaal vir optredes te skaaf.

Jopie: Definitief om ’n vollengte album agter ons naam te hê en op groter stages op te tree – saam met groot name – sodat ons raakgesien kan word deur diegene wat ons waardevol vind.