Ons gesels met die manne van Posduif

FOTO: NDW Photography

Wat gebeur as jy vyf ouens van ’n Engelse groep saam met ’n Afrikaanse voorsanger gooi? Jy kry die groep Posduif. Fanie Nel het met dié diverse groep gaan gesels. 

LEES OOK: Posduif onthou dit wat belangrik is met nuwe enkelsnit 

Waar kom die naam Posduif vandaan?

Vyf van die ouens is in ’n Engelse groep met die naam Rubber Duc en ons wou by die “voël” tema hou. ’n Vriend van ons het grapperig gesê Posduif en dit het dadelik by ons aanklank gevind… die band het toe ’n naam. 

 Vertel ons meer van jul nuwe enkelsnit Herinner My.

Herinner My dra soveel meer betekenis tot elk van ons in die groep. Ons almal het daardie blangrike mense saam met wie ’n mens die pad stap – of dit nou familie, vriende of lewensmaats is. Die liedjie is net ’n herinnering dat ons elke oomblik in ons verhoudings moet koester. 

Watter les wil julle hê moet luisteraars uit die liedjie leer?

Dit mag dalk baie na ’n cliché klink, maar die lewe is kort. Met wat tans aangaan in die wêreld moet ons waardeer wat ons het en dankbaar wees vir die geliefdes in ons lewens. 

Gee ons so ’n klein bietjie agtergrond van die lede in die groep.

James Boland is Posduif se voorsanger en kitaarspeler. Hy’s is lief vir familie, vriende, reis en kultuur en wil hê mense moet gelukkig wees. James glo daarin om hard te werk, om alles te gee en nooit op te gee. Hy werk in die dag en tree op in die aand. Hy’s soort van die groep se ‘Batman’. 

Nick Jordaan is die voorsanger vir Rubber Duc en is sedert, hy hoërskool verlaat het, in die musiekbedryf doenig.

Leeroy Sauls speel die dromme en is van Kaapstad. Hy het die wêreld platgereis as drommer vir die ontslape Bra Hugh Masekela en speel nou dromme vir Rubber Duc, Posduif en vir verskeie ander kunstenaars.

Amiel Gopal speel die baskitaar en is ook die bestuurder van Rubber Duc. Hy speel ook die baskitaar vir Posduif. Amiel het die baskitaar al in sy tienerjare baasgeraak toe hy in die kerk se band gespeel het.

Brendan Campbell speel kitaar en is ook die vervaardiger vir Rubber Duc en Posduif se musiek. Hy het vervaardiging by ASE studeer voor hy sy eerste album vir Daniel Barron vervaardig het. 

Kabeey Sax kan so te sê enige blaasinstrument bespeel. Hy het Jazz studeer en was voorheen deel van Micasa. 

V.l.n.r: Brendan Campbell, Kabeey Sax, James Boland, Leeroy Sauls, Nick Jordaan, Amiel Gopal. FOTO: NDW Photography

Wat is jul grootste droom?

Ons wil graag op elke fees in die land optree en ons musiek met soveel as moontlik mense deel. As ’n multikultruele groep wil ons ’n boodskap van hoop en samesyn oordra. Ons sal ook graag ’n SAMA-toekenning wil wen eendag.

Wat wil julle graag nog bereik?

Ware en total geluk. Interessant né? 

Het julle enige boodskap aan die wie julle musiek luister?

Wat ons nou deur gaan, gaan ons toekoms verander. Gebruik die tyd om ’n beter jy te skep. Leer nuwe vaardighede aan, lees, lei jouself op en hou aan met groei. As jy ongelukkig is met jou beroep, gebruik die tyd om iets nuuts op die kantlyn te begin of begin ’n nuwe uitdaging. Ons hoop ons musiek inspireer en moedig jou drome aan. 

Som Posduif in 5 woorde op.

Multikultureel, Vars, Sensasioneel, Afrikaans, Lewendig