Krone 5 gerat vir Pretoria én Kaapstad

Suid-Afrika se gunsteling saamsing jol – waar jy jou gunsteling musieksterre in konsert kan geniet en uit volle bors kan saamsing – is vanjaar vir die eerste keer in Pretoria en weer in Kaapstad te sien!

Krone 5 sal vanjaar op 28 en 29 Julie vir die eerste keer by die Sun Arena by Time Square in Menlyn in Pretoria, en op 4 Augustus by die Grand Arena, GrandWest in Kaapstad skud met die klanke van immergewilde treffers wat deur van Suid-Afrika se top kunstenaars uitgevoer sal word.

Andriëtte, Brendan Peyper, Elandré, Elizma Theron, Franja du Plessis, Jo Black, Juanita du Plessis, Kurt Darren, Liezel Pieters, Manie Jackson, Nádine, Nicholis Louw, Ray Dylan, Refentse, Ricus Nel, Robbie Wessels, Ruan Josh en Snotkop sal almal deel wees van die sterbelaaide program. Daar sal ook, soos altyd, ’n paar verrassings wees.

Die Krone-konsep is uiters gewild, tog baie eenvoudig: die grootste plaaslike en internasionale  ranglys treffers van toeka tot nou, die gewildste kunstenaars in Suid-Afrika en ’n gehoor wat in karaoke styl oorgehaal is vir ’n lekker saamsing jol.

Al die treffers word saamgestring in energiebelaaide, slim verwerkte keurspelle met woorde wat op die grootskerm vertoon word – ’n ideale geleentheid vir enige iemand, van die toekomstige Top 20 nommer een tot diegene wat liefs hulself by stort-concertos moet bepaal, om lekker saam te sing totdat hul stemme nie meer kan nie!

Kaartjies vir Krone 5 is nou beskikbaar by iTickets.