Dewald Wasserfall vier goue status met nuwe enkelsnit

Dewald Wassefall se album Jy Is Die Storm, het sopas goue status bereik – dis verkope van 15 000 eenhede sedert die uitreiking aan die einde van 2016. En watter meer gepaste manier is daar om dit te vier as met die bekendstelling van ’n splinternuwe treffer vanaf die album: Laat Die Lig Inkom.

Luister na die snit op Apple Music hier:
 


Volgens Dewald handel Laat Die Lig Inkom daaroor om te vergeet van die verlede se gevegte en seer, en te fokus op die toekoms. “Om die goeie in jou lewe toe te laat en afstand te doen van die sleg om jou eie lig te skep in tye van donker.” Die liedjie behoort in die voetspore van die eerste treffer, en titelsnit van Jy Is Die Storm te volg wat meer as twee maande in die Top 5 op die iTunes Afrikaanse trefferlys spandeer het.

Die bewustheid rondom Dewald se derde solo album het ook nog nie bedaar nie. Daarvan getuig die 310 000 kere wat die video van Jy Is Die Storm al op YouTube gekyk is, en die reaksie toe hy dit lewendig voor die gehore by die Afrikaans Is Groot konserte gesing het. En natuurlik sal die nuwe treffer op radiostasies regoor die land gehoor word, en die gewildheid van die album nog ’n verdere hupstoot gee.

_10A1705

Bo-en-behalwe ’n toer na Dubai in 2017, is Dewald se konsertkalender besig om vinnig vol te raak met plaaslike optredes wat maande vooruit bespreek is.

Dus, om op die hoogte te bly van Dewald se loopbaan en verwikkelinge, volg hom gerus op Twitter, Facebook en Instagram.