Die nuwe jaar bring ’n nuwe kunstenaar na die musiektoneel

Die naam is eintlik geen vreemdeling vir Afrikaanse musiek nie. Appel, Christoph Kotzé is een van Suid-Afrika se besigste kontemporêre Afrikaanse liedjieskrywers met kunstenaars soos Theuns Jordaan, Karlien van Jaarsveld, EDEN, Laurika Rauch, Bok Van Blerk, Lianie May en Dewald Wasserfall wat al treffers gehad het met liedjies uit sy pen. Maar nou betree hy die kollig onder die ander naam wat kunstenaars hom al lank voor ken: Appel.

As jy al by vertonings by feeste soos Aardklop, Innibos en die Rittelfees bygewoon het, het jy Appel dalk al sien optree. En na sy Ghoema-toekenning vir Liedjie van die Jaar vir EDEN se Superhero, en die titelsnit treffer uit die rolprent Somer Son, kan liefhebbers van Afrikaanse musiek hul nou gereed maak vir Lei my na die water, ’n CD gevul met 17 liedjes insluitend die titelsnit. Uiteindelik, na bewonderaars al vir jare probeer om hom sover te kry om sy eie album vry te stel, het hy nou gehoor gegee.

Oor die titelsnit het Appel die volgende te sê: “Ek het die inspirasie gekry vir die lied toe ek vir drie maande in die hospitaal gelê het en my vrou oggend in en aand uit my bygestaan het, aan my sy was toe ek weer tree vir tree leer loop het, woord vir woord weer leer praat het. Sy het letterlik my sielkundige wonde gebalsem.”
“Ek het daar die krag van ware liefde begryp en hoe ons vir mekaar baie meer kan beteken as enige aardse dinge,” vertel hy verder.

“Die waarheid is dat in vandag se tyd en eeu is ons baie gedrewe op onsself, die krag van die individu, maar eintlik hoort dit nie so nie. Ons kort mekaar en die krag van liefde word verskriklik onderskat.”

“Ek hoop terdeë dat hierdie lied mense se harte kan oopmaak en laat besef dat ‘n helpende hand weer die siel se vure kan laat brand.”

Benewens Lei my na die water, is daar ook, ’n duet saam met Bok van Blerk met die titel Lemoene en ’n paar Engelse snitte. Appel sien homself as ’n storieverteller en dit skemer beslis deur in sy musiek met lirieke wat handel oor die liefde en die impak daarvan op mens se lewe. Die liedjies het almal diepte, maar met ‘n kommersiële aanslag wat steeds die hartsnare sal roer.

Appel - Le my na die water

’n Trilogie van liedjies op die album, Lei my na die Water, Kom en lê my neer en Vroumens is nou beskikbaar op iTunes. Kry dit hier. 

Sedert dit op iTunes beskikbaar gestel is Vrydag, 10 Februarie, is al drie liedjies reeds in die Afrikaanse Top 5. Die hele album kan vooraf bestel word.

As jy dus hou van volwasse, kontemporêre popmusiek, wees op die uitkyk vir die CD wat binnekort op die rakke sal wees.

Kontak Aïda Steyn, aida@ihagency.co.za, as jy Appel wil bespreek vir ’n optrede met ’n persoonlike en intieme geur.