Die Afrikaanse sanger, Snotkop, is werklik nou ook so ‘cool soos Koos Kombuis’, soos hy in sy enkelsnit Cool Soos Koos Kombuis, sing. Dit volg nadat dié snit se musiekvideo 1 miljoen trefslae op YouTube verby gesteek het.
Snotkop het in dié video die geleentheid gehad om saam met sy held te werk. Volgens die radiostasie, Jacaranda FM, se webblad, het die musiekvideo met ongeveer 5500 kyke per dag geklim.
Kyk gerus die musiekvideo hier:
Cool Soos Koos Kombuis is een van die snitte op Snotkop se jongste album, HKGK, wat in Junie verledejaar vrygestel is, en reeds meer as 26 000 eksemplare verkoop het.
“Musiek máák is een ding, maar wanneer mense dit koop, dit inneem en dit soos ’n veldbrand versprei, is die bevrediging regtig onbeskryflik,” sê hy.
“My innige dank aan elkeen wat tot die vervaardiging van die album en musiekvideo bygedra het, elkeen wat dit help versprei het, elkeen wat my shows bywoon, my musiek koop en die video van hierdie song deel. Dankie, by uitsondering, aan die legend self – Koos Kombuis – vir sy bydrae en lewenslange inspirasie!”