Die veelsydige kitaar virtuose, Loki Rothman, se talent ken geen perke nie. Hy het die meeste genres op kitaar bemeester, het ’n meesleurende stem, verf asemrowende landskappe met sy oorspronklike lirieke en is ook ’n suksesvolle musiekvervaardiger.
Hierdie jaar het Loki sy vlerke selfs wyer gespan as kunstenaar en musiek vervaardiger. Hy het die klankbaan, sowel as sy eerste oorspronklike Afrikaanse treffer, Ons Op Ons Eie, vir die film, Jou Romeo, geskryf en opgeneem.
Loki het ook die liedjie, Blou, saam met die legendariese Laurika Rauch opgeneem en is onlangs vrygestel. Dit beteken dat Loki betrokke is by twee uitsonderlike liedjies wat tans op die radiogolwe dans van meer as 14 radiostasies regoor die land.
Ons Op Ons Eie se musiekvideo sal op 10 Desember geloods word op kykNET se Jukebox. Blou se video is tans nommer 20 op kykNET Top 20.
Weens Loki se druk skedule as solo kunstenaar en vervaardiger het sy tyd as Jack Parow se kitaarspeler uitgeloop. Tog is dit nie vaarwel nie: “Ek sal nog agter die skerms besig wees met hom. Ek vervaardig Jack Parow se nuwe enkelsnit Dis Bfk Remix asook ’n Jack Parow enkelsnit vir ’n nuwe fliek.”
2016 SAMA genomineerde kunstenaar in die Best Pop Album kategorie, Loki Rothman stel al vanaf 2015 sy gewilde One Man Band video dekkings van internasionale treffers vry vanaf sy Facebook-blad en YouTube kanaal. In 2016 het Loki ’n nuwe rigting ingeslaan hiermee en ’n samewerkwer, Pierre Greeff van Die Heuwels Fantasties nader getrek om Amanda Strydom se liedjie, My Kamer, te dek.
Loki en Pierre se aangrypende verwerking van My Kamer het groot lof ontvang en was onmiddelik suksesvol. Hierdie sukses het Loki aangespoor om ’n kans te vat en by die Afrikaanse musiek legende, Laurika Rauch, aan te klop vir ’n samwerking op een van haar liedjies. Die eindresultaat is Laurika en Loki se unieke en beeldskone verwerking van Blou.
Vir Loki was hierdie ervaring onbeskryflik en hy is baie opgewonde om hul weergawe van Blou met die publiek te deel. “Die harmonie van ons twee stemme op hierdie opname werk net. Ek dink nie iemand het al ooit hierdie akoestiese kitaar tapping styl met ’n Afrikaanse liedjie gedoen nie,” sê Loki.
“Dis vir my so ’n lekker musiekervaring om saam met Loki te werk. Sy klank is vars, sy musikale insig onberispelik en sy tegniese vermoëns ongelooflik – beide as sanger en kitaarspeler/instrumentalis. Ek beskou dit as ’n opperste voorreg om in sy dampkring te kan beweeg en saam met hom musiek te kan maak,” vertel Laurika op haar beurt.
Bly ophoogte van Loki se loopbaan op Facebook, Twitter en Instagram.