Die sanggroep, DZL, het pas hulle nuwe musiekvideo bekendgestel, net betyds vir die vakansieseisoen wat eersdaags aanbreek. Die video, Ek Laaik Dit bring ’n titsel somer na die skerm met die sonskyn, sonbruinlywe en ’n lekker ontspanne atmosfeer wat uitgebeeld word.
Ek Laaik Dit is die derde enkelsnit vanaf DZL se debuutalbum met dieselfde titel en die liedjie word al vir ’n tydjie op radiogolwe regoor die land gehoor. Hy is ook besig om die ranglys op verskeie radiostasies se Top 20 trefferparades te klim.
“Met die musiekvideo beeld ons weereens so bietjie van ons persoonlikhede uit wat wys dat ons nie die lewe te ernstig opvat nie en dat ons altyd tyd vir ’n grappie het,” sê Wiaan Fourie van DZL.
Die video is verfilm by die Menlyn Boutique Hotel in Pretoria en vervaardig deur Edward Hill van Magicbean Production, en videograaf, Jaun Buys. Die storielyn sentreer baie rondom die lirieke van die liedjie wat op die liefde sinspeel.
“Die liefde het mos kinkels, draaie en versoekinge, maar wanneer jy iemand werklik liefhet dan oorkom dit alles. Dit is juis wat ons met die video probeer uitbeeld en terselfdertyd ook bietjie humor inbring. Ons het natuurlik ook ’n verrassing of twee vir die kykers,” vertel Andries Hendrik Potgieter.
Kyk die musiekvideo hier:
DZL se nuwe album is in Mei-maand vrygestel en sedertdien het die twee manne al ‘n huishoudelike naam geword. Nie net vermaak hulle gehore regoor die land nie, hulle is ook baie betrokke by renosterbewaring en staan al bekend as ‘die twee renostermanne’.
Verder hou hulle hulself ook besig deur as modelle op loopplanke regoor die wêreld, en het pas teruggekeer van Windhoek Modeweek in Namibië. Andries Hendrik is vanjaar as Cosmopolitan se Mooiste Man vir 2016 aangewys.
Hulle het onlangs ook regstreeks op ons Facebook-blad gekuier.
Hulle is tans besig om hulle nuwe lewensstyl en gesondheids tydskrif te finaliseer wat ook vroeg volgende jaar bekendgestel gaan word.
