Reis saam op Hilde se Hartklanke

Die 7de Laan-ster, Hildegardt Whites is nou ook ’n VIA-ster, en na elke episode is daar ’n musiekvideo.  

Hildegardt Whites het geen bekendstelling nodig nie. Haar debuut op TV in 7de Laan het haar in duisende Suid-Afrikaners se harte laat inkruip. Hierdie talentvolle aktrise woeker met haar talente, op die verhoog, voor die kamera en nou met haar passie vir musiek. ’n Jaar gelede is besluit om uiteindelik haar eerste album te vervaardig. Dit was die begin van ’n kleurvolle reis, en ’n TV-program Hilde se Hartsklanke!
Jy word genooi om dié onthoupad saam te stap, terug na haar herkoms, die mense en klanke van haar kinderdae. Reis elke Woensdagaand, 20:00 saam met Afrikaans.com en VIA.

Jy kan aanklop by medemusikante uit die kleurvolle en unieke streke van die Weskus en Noord-Kaap waar Hilde grootgeword het. Sy is gebore op Nieuwoudtville. Stap saam met haar op die spoor van haar mense. Sy ontdek opnuut haar hartsklanke en hierdie ritme is aansteeklik!

Sy het 13 liedjies nodig vir haar album en sy het 30 dae! Reis saam met haar na Vredenburg, Clanwilliam, Vredendal, Van Rhynsdorp, Garies, Karkhams, Kamieskroon, Leliefontein, Pella, Kakamas, Kenhardt, Calvinia, Loeriesfontein, Nieuwoudtville en die Paarl. Elke dorpie en elke liedjie is spesifiek gekies om Hilde se eerste album uniek en oorspronklik te maak. Reis saam.

Indien jy die episode gemis het, kan jy elke Vrydag luister na die liedjie en na die volledige program op Afrikaans.com kyk. Ons bring vir jou die storie agter die storie en so ’n kykie agter die skerms.

Die liedjie wat Hilde opneem, is saam met Glenda Meissenheimer. Dié 20-jarige sing, speel kitaar én skryf haar eie liedjies, maar min mense buite Vredenburg weet van haar. Hilde besluit om Glenda se liedjie, Hier by jou, saam met haar op te neem.

Nuwe episode van Hilde se hartsklanke wys elke Woensdag om 20:00 op VIA (DStv-kanaal 147) en herhaal dan weer Saterdagaande om 21:00 en Sondagoggende om 09:00.