Toe die beeldskone Afrikaanse popsangeres Suzanne haar sewende album,Vuurbestand, onder haar eie onafhanklike platemaatskappy, Goldstar Music, aan die einde van verlede jaar uitgereik het, sou sy nie kon droom hoe suksesvol dit sou wees nie. Dié album het goue status bereik, is benoem vir ’n SAMA-toekenning en haar enkelsnitte word op talle radiostasies gespeel.
Nie elke kunstenaar kan spog met ’n musiekvideo vir elke enkelsnit nie.
Tot dusver het Suzanne musiekvideos vir elk van haar enkelsnitte; Vuurbestand, Belofte, Liefde is Alles en Die Lied in my Hart vanaf haar hoogs aangeskrewe album, Vuurbestand.
Suzanne doen nou só voort met haar huidige enkelsnit, Vergewe My.
Vergewe My is een van Suzanne se gunsteling liedjies vanaf die album. Die video is handgemaak met baie liefde en geduld deur haar en haar man, Jacobus Uys. Dit is nie aldag dat ’n sangeres haar eie musiekvideo redigeer met soveel sukses en kunstigheid nie.
Suzanne is nooit bang om nuwe dinge te probeer nie. Die musiekvideo, met futuristiese en digitale elemente, beeld ’n abstrakte geveg tussen ’n paartjie uit wat sinspeel op ’n emosionele oorlog. Hierdie geveg bestaan uit gechoreografeerde bewegings wat die wrywing tussen hulle dramaties en met passie uitbeeld.
“Dié oorlog, wat ook in die lirieke met ’n storm vergelyk word, het gesorg vir ’n dramatiese palet van kleure en grafiese elemente. As regisseur was dit ook my eerste produksie waar ander akteurs betrokke was. Dit was ongelooflik lekker om saam met die twee talentvolle jongmense (Karla Jordaan en Christiaan Smith)wat in die video verskyn te kon werk,” vertel Suzanne.
Kyk die video hier:
“Om jammer te sê is een van die moelikste dinge om te doen. Partykeer moet ’n mens jou trots in jou sak steek en bo jou ego uitstyg. Hierdie liedjie het ontstaan toe ek en Jacobus besef het dat ons altwee soms ons hardkoppigheid moet laat staan. Wanneer ons nou koppe stamp sal die een vir die ander sing: verge-e-e-e-we my en dan lag ons saam daaroor.”