Afrikaanse groep skitter op loopplank in Namibië

Die manne van die sanggroep, DZL, is ou bekendes wanneer dit by die loopplank kom en die afgelope naweek het hulle behoorlik hulle staal in Namibië gewys. Andries Hendrik Potgieter en Wiaan Fourie is deur die organiseerders van die Windhoek Modeweek uitgenooi om deel te wees van hierdie baanbreker geleentheid.

Dit was die eerste modeweek wat in Namibië gehou is en bekende name, onder wie Suid-Afrikaanse ontwerper, David Tlale, wat ook al vele keer sy werk by modeweke soos New York ten toon gestel het, was ook deel van die geleentheid. Ander bekende ontwerpers vir wie DZL ook op die loopplank verskyn het was Palse Homme, Hafeni Frans en Be Yourself by Puma.

“Dit was ’n ongelooflike voorreg om deel te wees van hierdie geleentheid. Namibië is bekend as ’n hub vir ontwerpers en mode oor die algemeen en daarom kon ons nie anders as om ja te sê toe hulle ons vra om betrokke te raak nie. Om vir ontwerpers soos David Tlale en Palse te loop was beslis loopbaan hoogtepunte,” vertel Andries.


Onder die organiseerders van die geleentheid was Luis Munana, ’n voormalige wenner van Big Brother Africa en ook ’n bekende model. Die produksie was deur die Kaapstadse groep, Group of Creatives, behartig wat ook vir geleenthede soos SA Menswear Week verantwoordelik is.

Die modeweek was nie sonder sy voorvalle nie. Die geleentheid is veronderstel om op die dak van een van die grootste winkelsentrums in Windhoek gehou te word maar net voor die aanvang van die eerste aand het ’n groot reënbui uitgesak; die eerste in 3 jaar vir Windhoek, en verrigtinge is na die volgende dag uitgestel.

Buiten Windhoek Modeweek het Andries en Wiaan onder andere ook al aan New York Fashion Week, Ghana Mercedes Benz Fashion Week, SA Menswear Week, Durban Fashion Fair, SA Fashion Week en vele meer deelgeneem. Andries is ook vanjaar aangekondig as Cosmopolitan se Mooiste Man vir 2016.

Tussen die modelwerk deur sing DZL-manne voltyds en het vanjaar ook hulle nuwe album beskikbaar gestel. Hulle nuwe musiekvideo Ek laaik dit’ gaan binnekort vrygestel word.

“Ons is baie opgewonde om die nuwe album met almal te deel. Dit was ongelooflik pret om dit op te neem en ons het so ‘n verrassing of twee vir julle,” sê Wiaan.

Alle foto’s is geneem deur SDR Foto