Die 21-jarige Elandré Schwartz was nog altyd passievol oor musiek en die musiekindustrie. Dié ster, van Despatch in die Oos-Kaap, het reeds van ’n vroeë ouderdom sy passie vir musiek begin kweek, en by klein venues begin optree, maar hy sou nooit kon raai dat sy lewe só drasties verander sou word toe hy Maandag by die Bok Radio 98.9 FM en Bok TV-ateljees instap.
Elandré het ’n platekontrak van Select Musiek ontvang.
Die onderhoud het afgeskop met ’n doodnormale geselsie met die Bok Breakfast aanbieders, Wimpie van der Sandt en Le-Lue Roode, waarna hy een van Bruce Springsteen se liedjies Tougher Than The Rest en Josh Turner se Your Man gesing het.
Ernst Kleinhans van Select Musiek was op die telefoon ná sy optrede om die groot nuus regstreeks tydens die uitsending met hom te deel. “Ek is bied jou ’n platekontrak vanaf Select Musiek, ’n afdeling van Sony Music Entertainment.” het Kleinhans gesê. “Jy verdien om gehoor te word, en om ’n CD uit te reik.”
Elandré deel in die geselskap van bekendes soos Kurt Darren, Nicholis Louw, Refentse, Andriette, Snotkop, Brendan Peyper en vele meer.
Dit het egter nie net daar gestop nie. Die Bok Radio-span het ook gesorg vir ’n paar optredes en hy gaan deel wees van die Bok Radio Bootreis wat in Januarie 2017 vertrek.