chatNOU! nooi jou om weeksaande saam TV te maak

In die 21ste eeu besluit jy wat jy waar en hoe wil sien en hoor. Dis wat digitale burgerskap beteken. Hoekom dan nie ook van waar ook al jy is regstreeks saamgesels in ’n nuwe versoek-, musiek- en leefstylprogram, wat nie net vir jou gemaak is nie, maar wat jy help maak?

Met chatNOU! kan jy jouself op TV sien – elke Maandag tot Vrydag van 16:00 tot 18:00 op kykNET NOU! (DStv-kanaal 146). Dis ’n opwindende twee-uur-lange regstreekse uitsending met aanbieders en kykers wat direk en interaktief met mekaar chat. Dit beteken jy kan:

• inskakel en jou gunsteling musiekvideo opdra aan daardie spesiale persoon,
• jou eie sosiale media-boodskappe op die skerm sien en,
• sélf ’n onderhoud met bekendes voer.

Die vier aanbieders is die voormalige NRG-sanger Stephan van Huyssteen, beter bekend as “Stephantasties”, die blogger-aktrise Ansu Visser, Jacaranda FM-omroeper Carla MacKenzie en die sanger-akteur Willem Botha.

In die geselskap van hierdie sprankelende aanbieders bied chatNOU! ’n platform vir kykers om hul menings oor onderwerpe via sosiale media met ons en die ander kykers te deel. Dié program sal ook insiggewende onderwerpe bekendstel waaroor kykers gesprekke met mekaar kan aanknoop.

Van die leefstylonderwerpe wat gereeld aangeraak sal word sluit onder meer flieks, musiek, mode, kos, gaming, tegnologie, vermaak, nuwe tendense, teater, ontwerp, boeke, reis en D.I.Y. in – en natuurlik ook sosiale media. Die aanbieders sal daagliks interaktief met kykers oor dinge soos dié gesels.

Deur die loop van elke program sal plaaslike en internasionale musiekvideo’s gespeel word. Daar sal ook erkenbare gesigte van regoor die mediabedryf wees wat via sosiale media met die kykers gesels, vrae beantwoord en ons vertel wat hulle tans opgewonde maak, waarmee hulle besig is en hul menings lig oor verskeie relevante temas.

Kyker word dus uitgenooi om elke weeksaand ’n gas op ’n waarlik interaktiewe geselsprogram te wees.

Kom chatNOU! op kykNET NOU! – nie later nie as NOU! nie.