Oops! It appears that you have disabled your Javascript. In order for you to see this page as it is meant to appear, we ask that you please re-enable your Javascript!

Goue status vir Bok binne een week

Daar is beslis géén keer aan Bok van Blerk nie, want hy het goue status met sy nuutste album bereik slegs binne een week ná die vrystelling!

14718653_1149132835170269_4338806311133670999_n
Bok van Blerk se album is nou beskikbaar. Foto: Inhoud Huis Facebook

Van De La Rey Tot Nou bevat 15 splinternuwe treffers en met die reaksie by konserte en sy goue status, is dit duidelik dat hy ’n immergewilde en geliefde sanger is. Heelparty liedjies kom uit die pen van Johan Vorster, Christoph Kotzé en Bok self. Van die liedjies op die album is die titelsnit vanaf die Modder en Bloed-klankbaan, Bloedbroers en Goeie hout. Reënspinnekop en Winterkind, onderskeidelik uit die pen van Valiant Swart en Koos Kombuis is ook te hoor op Van De La Rey Tot Nou.

Daar is heelparty ooreenkomste tussen Bok se eerste album en dié een, behalwe vir die titel wat baie dieselfde is. Beide bevat liedjies oor motors, 68 Chevy op De La Rey en Datsum bakkie op die nuwe album. Beide bevat liedjies geskryf deur ander immergewilde sangers en skrywer en selfs die foto’s op die omslag is op dieselfde plek geskiet. Die omslagfoto waar Bok by ’n kweekhuis staan en uitkyk is simbolies aangesiek hy uitkyk oor wat die volgende dekade gaan inhou.

Bok vertel, “Die afgelope tien jaar voel steeds onwerklik en hierdie album is my manier om dankie te sê vir almal wat die musikale paadjie saam met my gestap het, vanaf die mede-musikante tot die mense wat die albums koop en my konserte bywoon.”

Boonop is daar ’n kuier DVD met lewendige optredes op pad; wát is ’n meer gepaste manier om dankie te sê aan sy ondersteuners vir tien jaar se lojaliteit!

Van De La Rey Tot Nou is nou by musiekwinkels beskikbaar. Wees ook op die uitkyk vir ’n lekker partytjie of kuier-om-die-braai DVD wat by Weiveld opgeneem is en wat van sy grootste treffers sal insluit, asook die nuwe treffer Van De La Rey Tot Nou.