Die Matzikama was die naweek in rep en roer met die Madeliefie Makietie waar feesgangers nie net bederf is deur van ons land se grootste kunstenaars nie, maar ook net lekker kon saam kuier en die beste wyn, bier en kosse uit die streek kon geniet.
Die fees het afgeskop met die immergewilde Mej. Madeliefie-kompetisie, met Snotkop as gaskunstenaar. Vrydag-oggend was daar pret en kompetisies by die Agri-Werkersdag en Vrydagaand het kunstenaars soos Wynand en Chereé, Hendrik Spangenberg, Refentse, Theuns Jordaan, Ricus Nel en Liza Brönner die verhoog behoorlik aan die brand gesing.
Draadloos: Hendrik Spangenberg gesels oor digitale-album
Saterdag was die beurt van kunstenaars soos Kurt Darren, Adam, Elvis se Seun en Karen Zoid. Die Daisy Zing-kompetisie en die damesoggend met André Schwartz was ook hoogtepunte. “Mense het van alle hoeke van die land gestroom om saam te makietie op Vredendal,” sê Cindy Schade, skakelbeampte van Madeliefie Makietie.
“Die aantal besoekers het ons verwagtinge oortref,” vertel sy verder. Madeliefie Makietie is nie iets wat net een keer ‘n jaar plaasvind nie, dis ‘n voltydse leefstyl-program en elke sent wat by die fees genereer word, word teruggeploeg in die omgewing en sy mense.
“Finansiële en projekte-hulp word aan alle skole in die Matzikama-gebied, wat ʾn befondsingsversoek indien by die komitee, verleen.”
Feesgangers kan gerus ook volgende jaar se datums in hul dagboeke aanbring. Madeliefie Makietie 2017 vind plaas vanaf Donderdag, 28 September tot Saterdag, 30 September 2017.