Die Cederberg Rooibos Kunstefees bring die kunste na die platteland

Die Cederberg Rooibos Kunstefees, wat einde Oktober op Clanwilliam plaasvind spog vanjaar met ’n verskeidenheid  toneelstukke, kunsuitstallings, musiekproduksies, praatjies en gesellige kuiers met heerlike kos, wyn en egte Clanwilliam-gasvryheid.

Daar is werklik iets vir elke feesganger by die fees wat vanjaar vanaf Donderdag, 20 Oktober tot Sondag, 23 Oktober op Clanwilliam in die Wes-Kaap plaasvind.

“Met die fokus spesifiek op die kunste sal toneelstukke soos Die Droomstelers, ’n produksie wat ontstaan het uit Clanwilliam se eie mense en wat handel oor alles wat ons drome steel, beslis die gehoor se hartsnare roer,” vertel Alicia Erasmus, organiseerder van die ComNet groep.

“Ander toneelstukke wat ook beloof om treffers tydens die fees te wees sluit in Mamre – ’n teaterblyspel wat die lewe deur musiek vier en sielvol vertolk word deur die talentvolle jong akteur en sanger Whaden Johannes asook Amper, Vrystaat – ’n produksie wat die prys vir die Beste Debuutproduksie by die Vrystaat Kunstefees 2015 ontvang het,” voeg sy by.

Vir diegene wat lief is vir kook, kos en wyn is daar ook ’n verskeidenheid geleenthede op die feesprogram beskikbaar. Marlise Scheepers, oftewel Sjef Snoekie, se aweregse sin vir humor en slag met kos word in Laat die Potte Sing gekombineer om nie net heerlike resepte te skep nie, maar ook lewe te blaas in raakvatstories en -beskrywings. Hierdie is ’n kans om saam met Sjef Snoekie te kook, sing, stories te vertel en lekker saam te lag.

Feesgangers kan ook aansit vir ’n heerlike Leipoldt- en Rooibos-geïnspireerde Sondagmiddagete, voorberei deur die gewilde kykNET Kokkedoor-beoordelaar, Sjef Nic van Wyk, wie se kosstyl spreek van hartlike landelike geure.

Gedurende die fees sal daar natuurlik ’n kunsuitstalling by Die Kunshuis wees met die werke van kunstenaars soos Ulric Roberts, Terence Visagie, Stephen Basset, San Alive en dr. Helene de Kock. Feesgangers kan uitsien na rieldans-kunswerke, rotskuns en Koi-juwele. Tydens die opening van die Cederberg-kunsuitstalling sal dr. Ernst van der Walt as openingspreker optree en ook sy boek, Teen die Stormwinde, bekendstel.

Die gewilde Kuiertuin sal weereens heerlike etes bedien tydens vanjaar se fees en ook ’n kontantkroeg beskikbaar hê. Feesgangers kan uitsien na optredes deur musikante soos Die Wildberries, Nic Stevens, Clanwilliam Steel Band, Michael Visser, Waldo Lotz en die kookwater Vredendal-rockers, Dobbelsteun.

Kaartjies vir die onderskeie produksies wat by die Cederberg Rooibos Kunstefees aangebied word, is vanaf Maandag, 3 Oktober, by die Cederbergfees-kantoor in Nancy’s Tearoom beskikbaar.

Besoek gerus die Cederberg Rooibos Kunstefees se webblad by www.cederbergfees.co.za vir die volledige feesprogram en volg ook die fees op Facebook (@CederbergKunstefees), Twitter (@cederbergfees) en Instagram (@cederbergfees) vir daaglikse nuus en staan die kans om kaartjies na verskeie produksies te wen.