Binnekort gaan daar vir twee dae boeremusiek gepraat, gedans en geslaap word wanneer die Grootvoël Boeremusiekfees vir ’n derde keer op Vrydag, 23 September en Saterdag, 24 September op Oudtshoorn aangebied word.
Dié gewilde boeremusiekfees het sy ontstaan te danke aan Willem Marais en Daantjie Kotze wat tydens ’n skoolreünie in 2014 besluit het om ’n fees eksklusief met boeremusiek te begin. Oudtshoorn is ook alombekend as die “grootvoël paradys”, daarom die naam vir die fees. Ses orkeste het saam gespeel en gesorg vir ’n groot samekoms in sy eerste jaar.
“Een van die groot liefdes in my lewe is boeremusiek en om hierdie besondere musiek te laat bly voortleef is vir my ’n groot doel en prioriteit.” sê Willem Marais, stigter van die musiekfees.
Volgens Marais is dit een van sy pogings om boeremusiek soveel blootstelling as moontlik te gee. Dis juis die wenresep van wat die fees so ’n sukses maak.
Vanjaar kan feesgangers uitsien na orkeste soos, Die Kaapland Boereorkes, Outydse Klanke Orkes, Die Stoepsitters en Die Sanvelders. Benewens die lekker musiek, gaan feesgangers ook getrakteer word met die lekkerste kos vanuit die omgewing en selfs ’n kontantkroeg.
Verskeie stalletjies wat egte feeskos, soos oliebolle, skyfies, biltong, koffie en ontbyt-jaffels verkoop gaan ook sorg vir ’n feestelike atmosfeer terwyl die kleinspan kan uitsien na ’n gebied spesiaal toegewy aan hulle.
“Ons het iets vir oud en jonk op die spyskaart, so daar is geen rede vir stilsit. Dis vermaak op sy beste, nes ons Afrikaners kan.” sê Susan White, skakelbeampte van die Grootvoël Boeremusiekfees.
Kaartjies vir die fees is nou by Computicket, Shoprite/Checkers en House & Home beskikbaar en beloop R30 per dag of R50 vir ’n naweekpas. Kinders onder 12 jaar kry gratis toegang. Kaartjies is ook aanlyn by www.boeremusiekfees.co.za beskikbaar.
Volg die Grootvoël Boeremusiekfees op Facebook, vir daaglikse nuus.