Die 27ste Hantam Vleisfees: ’n Naweek van skaapvleis, musiek, en Hantam-gasvryheid

Ongeveer 7 000 feesgangers – die meeste nóg – van regoor Suid-Afrika het in hul hordes gestroom na die jaarlikse Hantam Vleisfees die afgelope naweek op Calvinia.

“Ons is so bly dat besoekers van regoor Suid-Afrika ons fees in sulke groot getalle kom bywoon het. Dit was vir ons ’n wonderlike belewenis,” vertel Simey de Klerk, een van die feesorganiseerders. Dié fees, wat ingestel is om die produksie van skaapvleis vanuit die streek te bevorder, het vanjaar sy sewe-en-twintigste bestaansjaar gevier.

Soos die naam beloof, was daar geen gebrek aan vleis nie – skaapvleis, spesifiek. Die kosstalletjies het gesorg vir ’n wye verskeidenheid smulkosse, wat gestrek het van skaaptjops, braaibroodjies en wors, tot afval, sosaties, skaapkop en selfs kliprib waar die ribbetijies tussen lae Karoo-klip gebak word.

Dobbelsteun - Copy
Foto: Stephen Sillifant

Bedags het verskeie handelaars ook hul produkte uitgestal en verkoop. Braaitoerusting, ontwerpersklere, juweliersware, leerprodukte, en skilderye is maar net ’n paar van die items wat te koop was.

Die hoogtepunt was ongetwyfeld Saterdag. “Feesgangers was behoorlik in vervoering met die sterkman-kompetisie, rieldanse, die trekker- en ou voertuie-optog en die skaapskeer-demonstrasie” sê Lizette Lambrechts, ook ‘n organiseerder van die fees. Mathys Roets, Die Broers, Klipwerf en Kurt Darren het die voete laat jeuk en die jong rock-groep van Vredendal,  Dobbelsteun, het die mense aan die praat gehad.

Die Vleisfees sal volgende jaar op Vrydag, 25 en Saterdag, 26 Augustus vir die 28ste keer op Calvinia aangebied word en feesgangers word sterk aangemoedig om vroegtydig blyplek te bespreek om teleurstelling te voorkom. Besoek gerus die Hantam Vleisfees se webblad by www.hantamvleisfees.com en gaan kyk ook na die Facebook-blad (@CalviniaVleisfees), Twitter-blad (@Vleisfees), en Instagram (@hantamvleisfees).