Calvinia is skaapwêreld en die laaste naweek in Augustus is alles en almal, in en om die dorp, in rep en roer as die jaarlikse Vleisfees op Vrydag, 26 en Saterdag, 27 Augustus 2016, plaasvind.
Vanjaar, is dit reeds die 26ste fees en die hoofdoel van die fees is om die heerlike, geurige skaapvleis van die streek te bevorder. Beslis ’n hoogtepunt op die kalender.
Tydens hierdie gesogte geleentheid sal besoekers die geleentheid hê om saam met familie en vriende aan al die feestelikhede deel te neem wat vanjaar op die spel is. Dit sluit onder andere top gehalte Afrikaanse kunstenaars, kosstalletjies en ’n reeks opwindende aktiwiteite in.
Kunstenaars wat by die fees optree sluit onder meer Kurt Darren, Mathys Roets, Klipwerf Orkes, Christo en Cobus, Manie Jackson en Dillon Lerm in. Daar is dan ook baie aktiwiteite waaraan feesgangers kan deelneem, insluitende ’n vleiseet-kompetisie, ’n bergfietsrit, ’n sterkman-kompetisie en ’n 16km landloop-wedren. Feesgangers kan ook verskeie tentoonstellings bywoon, soos die skaapskeerdemonstrasie, rieldansers, trompoppies en ’n laservertoning.
Nog ’n vertoning wat nie misgeloop moet word nie is Arno van Zyl en Boesman van Zyl se Stompe Stories wat feesgangers sal laat huil van die lag. Hierdie spesiale geleentheid word aangebied in die ou storie-vertelling tradisie van groot name soos Tolla van der Merwe en kan daarom beslis nie misgeloop word nie.
Kaartjies is slegs by die hekke beskikbaar teen R40 vir volwassenes en R10 vir kinders op Vrydag, 26 Augustus en teen R80 vir volwassenes en R40 vir kinders op Saterdag, 27 Augustus. Toegang sluit vasdans en vertonings van kunstenaars in.
Besoek gerus die fees se webblad of volg hulle op Facebook, Twitter en Instagram vir meer inligting oor die fees.