Karen Zoid, Theuns Jordaan, Kurt Darren, Snotkop, Wynand en Chereé, Elvis se Seun, Adam, Wicus van der Merwe, Rooies, Liza Brönner, Ricus Nel, Hendrik Spangenberg, Dr. Victor & The Rasta Rebels en Refentse Morake is van Suid-Afrika se voorste kunstenaars wat vanjaar by die Madeliefie Makietie in die hart van die Matzikama gaan optree.
Madeliefie Makietie vind vanjaar van Donderdag, 29 September, tot Sondag, 2 Oktober 2016, op Vredendal plaas. Benewens die groot buitelug-verhoog, pretpark en stalletjies word die Pars-en-Proe-lokaal omskep in ’n kontrei-kos-deli met die streek se wyne.
Die fees spog ook vanjaar met ’n volledige landbou-uitstalling waar verskeie spelers uit die landboubedryf betrokke sal wees. Ondernemings wat by die landbou-ekspo betrokke wil wees of ander stalletjies by die fees wil bedryf, kan nou reeds hier aansoek doen.
Cindy Schade, skakelpersoon van die fees, sê feesgangers moet nou reeds verblyf op Vredendal bespreek. “Verblyf in die streek is beperk. Maak seker jy word nie aan die slaap gevang nie, so bespreek vroegtydig. Vredendal bied ’n wye verskeidenheid van hotelle, gastehuise, kampeerterreine en meer om van te kies. Blaai gerus hier deur ons verblyf opsies.
Volgens Schade is Madeliefie Makietie ’n voltydse leefstyl-projek om die jeug van die streek te ondersteun. Van die inkomste word gebruik om fasiliteite by skole te skep. “Tydens die fees is dit vir ons ook belangrik om waarde vir ’n veilige en gesinsvriendelike atmosfeer te skep. Ons is baie trots dat ons dit juis verlede jaar met sukses kon regkry.”
Die Mej. Madeliefie Makietie is elke jaar ‘n hoogtepunt in die streek. Inskrywings vir Mej. Madeliefie, wat op Donderdag, 29 September plaasvind, is reeds oop. Snotkop gaan optree as seremoniemeester.Inskrywings kan op die fees se webtuiste gedoen word.
Kaartjies is nou by Computicket beskikbaar en jy sal nie glo hoeveel waarde vir geld jy gaan ontvang vir die verskeidenheid van vermaak wat jy by vanjaar se fees sal geniet nie. Kaartjies wissel vanaf R60 tot R120 per persoon.
Besoek Madeliefie Makietie se webblad vir alle feesinligting en hul Facebook-blad.