Varsity Sports en kykNET snoer kragte saam om ’n nuwe koorkompetisie te loods. Varsity Sing saai vir die eerste keer op kykNET op 14 Julie 2016 uit, met 12 universiteitskore wat vir 13 weke lank teen mekaar gaan meeding om as Suid-Afrika se beste koor gekroon te word.
“Varsity Sing gaan Donderdagaande nuwe lewe gee vanaf Julie vanjaar,” sê Francois Pienaar, uitvoerende hoof van ASEM. “TV-gehore gaan deur die beste kore in die land geïnspireer en vermaak word. Verwag ’n kombinasie van tradisionele, kontemporêre en oorspronklike koormusiek tydens ’n indrukwekkende vertoning.”
Die eerste vier rondes van Varsity Sing, insluitende die semi-finaal, sal regstreeks voor ’n gehoor opgeneem word en van Julie tot September op kykNET uitgesaai word. Die kompetisie se finaal sal tydens ’n regstreekse musiek-ekstravaganza plaasvind, waartydens die Varsity Sing-kampioene bekend gemaak sal word.
“kykNET is baie opgewonde oor hierdie kompetisie en vennootskap met ASEM,” sê Karen Meiring, M-Net Direkteur: kykNET-kanale. “Koorsang is een van die gewildste kunsvorms ter wêreld wat uitgevoer word en in Suid-Afrika het ons uitstekende universiteitskore. Om hulle te kry om op nasionale TV op te tree en mee te ding sal koorsang na ’n volgende vlak van gewildheid neem.”
Die volgende universiteite neem deel:
Universiteit van die Wes-Kaap
Universiteit van Kaapstad
Stellenbosch Universiteit
Nelson Mandela Metropolitaanse Universiteit
Rhodes Universiteit
Tshwane Universiteit van Tegnologie
Universiteit van Johannesburg
Universiteit van Pretoria
Universiteit van Limpopo
Universiteit van die Vrystaat
Sentraal Universiteit van Tegnologie
Vaal Universiteit van Tegnologie
Sosiale media
Facebook: facebook.com/VarsitySportsSA en facebook.com/kyknet
Twitter: @VarsitySportsSA en @kykNETtv
Instagram: @VarsitySportsSA en @kyknettv
YouTube: youtube.com/VarsitySportsSA
Hutsmerk: #VarsitySing