Oops! It appears that you have disabled your Javascript. In order for you to see this page as it is meant to appear, we ask that you please re-enable your Javascript!

Karlien van Jaarsveld en Elvis Blue blink uit by SAMA’s 2016

Die Oos-Kaapse Afro-soulsanger Nathi het die naweek skoonskip gemaak op 22ste Samas, die groot jaarlikse prysaand vir Suid-Afrikaanse musiek. Hy het Saterdagaand vyf Samas en ’n reusekontantprys gewen op die glansryke geleentheid in die internasionale konferensiesentrum in Durban.

Afrikaanse kunstenaars het in drie kategorieë uitgeblink: Karlien van Jaarsveldhet beste Afrikaanse popalbum vir My Hartjie gewen, Elvis Blue beste kontemporêre album met Êrens in die middel van Nêrens, en Wouter Kellerman beste instrumentale album met Love Language.

Wouter Kellerman ontvang sy SAMA vir Beste Instrumentele/klassieke album.
Wouter Kellerman ontvang sy SAMA vir Beste Instrumentele/klassieke album.

“My Hartjie” is die temalied van die rolprent Hollywood in My Huis en die ander bekende enkelsnit van die topverkoperalbum is “Geskeurde Jeans”. Dié album het Van Jaarsveld opgedra aan die babadogtertjie wat sy en haar gewese man, Derick Hougaard, eertydse Blou Bul-losskakel, verlede jaar verloor het.

90e47aa0cfc94038b604aa39e67aa70c
Karlien van Jaarsveld ontvang die SAMA vir Beste popalbum.

Blue se tweede Afrikaanse album, Êrens in die Middel van Nêrens, is bekend om die enkelsnitte “Die Hemel” asook “Môre kan maar kom”. Dit is verlede jaar aangewys as een van die top100 albums in Suid-Afrika gegrond op verkope.

Met die sukses van die album voeg Blue, wat vanjaar 15 jaar in die plaaslike musiekbedryf vier, nog ’n Sama by die drie wat hy reeds koester, 2 Ghoemas en 2 platinumalbums. In dié kategorie het hy Andriëtte, Neil Somers, Bok van Blerk en Stiaan Rynierse uitgestof.

Jack Parow en Freshlyground het die Sama vir beste musiekvideo gewen vir hul lied “Army of One”. Hierin speel Parow ’n tipe James Bond-karakter aka Jan Bont op ’n “aksiebelaaide” sending in sy oranje Skyline-krokmotor – kompleet in sy afdakkie-pet – om Zolani Mohola, voorsanger van Freshlyground, te “red”.

Die Grammybekroonde fluitspeler Wouter Kellerman het sy tweede opeenvolgende Sama vir beste instrumentale album gewen vir sy vierde album, Love Language. Hierin benut hy invloede van Senegal, Spanje, Kuba en Indië.

Nathi se album Buyelekhaya, bekend om die enkelsnit “Nomvula”, is vereer as beste R&B/Soul/Reggae-album, beste nuweling, beste manlike kunstenaar, beste verkoper van ’n volle snit (vir aflaaidoeleindes) en beste verkoper van die jaar. Hierdie album het dubbelplatinumstatus in die eerste maand van uitreiking bereik en is meer as 2,9 miljoen keer afgelaai.

Op sy hakke volg die DJ en vervaardiger Black Coffee, met vier Samas. Die gospelsterSfiso Ncwane en die kwaito-groep Dbn Nyts het elk drie Samas gewen. Zonke is die beste vroulike kunstenaar van die jaar met haar album Work of Heart.

Vanjaar is drie musikante vereer vir hul lewenswerk – Nana Coyote en Bhekumuzi Luthulialbei postuum, asook die veteraan Roger Lucey. Samas in ander kategorieë is ook toegeken. Sien die volledige lys by www.samusicawards.co.za