“Klassieke musiekliefhebbers kan vanaf Vrydag, 27 Mei kaartjies koop vir Klein Karoo Klassique. Op die program vanjaar is die Suid-Afrikaanse fluitspeler en Grammy-wenner, Wouter Kellerman en intieme musiekuitvoerings deur bekroonde klassieke musici.”
Só sê Rhodé Snyman, uitvoerende hoof van dié fees, wat van Vrydag, 12 tot Sondag, 14 Augustus op Oudtshoorn aangebied word.
Klassique word Vrydagaand deur die SAMA-genomineerde Cape Town Tango Ensemble (Stanislav Angelov, bandoneon & trekklavier; Petrus de Beer, viool; Albert Combrink, klavier en Charles Lazar, kontrabas) met Piazzolla and beyond geopen. Van Astor Piazzolla se gewildste komposisies, waaronder Angel Suite, Four Seasons of Buenos Aires en Adios Nonino en komposisies deur Richard Galeano en Aleksandar Simić word uitgevoer.
Bekroonde kitaarspeler, James Grace, bied Saterdagoggend ’n program van sy SAMA-benoemde albums en oorspronklike verwerkings van sy vertoning Guitar Hero aan, met musiek van Bach, die Beatles, Albeniz, Rodrigo en Tárrega.
In Vier vir Twee (Saterdagmiddag) neem Mareli Stolp (klavier) en Morné van Heerden (klarinet) die gehoor op reis deur die mooiste werke vir dié twee instrumente, met musiek van Franse komponiste Claude Debussy en Camille Saint-Saëns, gekombineer met werke van Suid-Afrikaanse komponiste, Kevin Volans en Stefans Grové.
Saterdagmiddag se Nagmusiek, met Grethe Nöthling (klavier) en Matildie Thom Wium (mezzosopraan), is ’n samestelling van kort werke deur die Suid-Afrikaanse komponis, Arnold van Wyk. Dié komposisies dateer uit die tyd toe Van Wyk as kind vakansies in De Rust deurgebring het en word gebind deur ’n verhaal uit van sy briewe en dagboekinskrywings. Beide Nöthling en Thom Wium se doktorale studies het op Van Wyk se werk gefokus.
Wouter Kellerman, Grammy-wenner en SAMA-bekroonde fluitspeler, verken Saterdagaand die veelsydigheid van die fluit in ’n vermenging van klassieke en kontemporêre klanke met werke van o.a. Marin Marais, Brian Boru en sy eie moderne klassieke geïnspireerde Buenos Aires, The Long Road en Notre Futur.
Sondagoggend bied die Helderberg Baroque Trio (Charlotte Berger, hobo, Traverso- & blokfluit; Annien Shaw, viool en Erik Dippenaar, klavesimbel), ’n barok-program met musiek van Georg Friedrich Händel, Arcangelo Corelli en Johann Sebastian Bach aan.
Klassique eindig Sondagmiddag op ’n hoë noot met die ATKV-Afsluitingskonsert, deur sopraan, Noluvuyiso Mpofu, klarinetspeler, Junnan Sun, pianis Elna van der Merwe en die bekroonde Suid-Kaap Kinderkoor o.l.v. Jan-Erik Swart.
“Kaartjies is beskikbaar by Computicket, Shoprite/Checkers en House & Home. Die ongelooflike winskoop van die Klassique Pakket maak dit vir feesgangers moontlik om elke noot te hoor, aangesien die program so geskeduleer word dat geen uitvoerings bots nie”, sê Snyman. Dié pakket kos R600 en bied ’n besparing van R275.
Meeste uitvoerings word in die NGK Park aangebied, na verlede jaar se positiewe terugvoer oor dié venue. Sondag se uitvoerings vind op die pragtige Surval Boutique Olive Estate net buite Oudtshoorn plaas.
Kaartjies is beskikbaar by Computicket. Besoek die fees se Facebook-blad of volg hul op Twitter en Instagram vir mkeer inligting.