Kuier saam met DZL by Musica en wen!

FOTO: Francois Olivier

Die manne van DZL skop eerskomende naweek hul landwye Musica-toer af, waartydens lede van die publiek die geleentheid gegun word om saam met Andries en Wiaan te kuier, foto’s te neem en sommer ’n getekende kopie van hul nuwe album, Realiteit, kan aanskaf.

Die eerste stop op die toer is Saterdag, 21 Julie, by Musica Kolonade vanaf 11:30 tot 12:30 en die manne is slaggereed vir ’n groot kuier!

“Daar is vir ons niks so lekker as om tyd met ons ondersteuners en die publiek te spandeer nie. Wanneer mens optree kry jy geleentheid om na die tyd ’n paar handtekeninge uit te deel maar daar is nie regtig interaksie nie. Hierdie is vir ons ’n wonderlike geleentheid om bietjie tyd saam met ons ondersteuners te spandeer en hulle beter te leer ken,” vertel Andries.

Behalwe vir die lekker kuier kan aanhangers ook ’n groot prys losslaan. Om in aanmerking te kom vir die prys is heel eenvoudig: “As jy saam met ons by ’n Musica kuier, neem ’n foto met jou nuwe DZL-album en post dit op ons sosiale media blaaie. In die week na afloop van die in-store sal ons ’n wenner kies en daardie persoon wen ’n DZL-hamper en ook ’n uitnodiging na ’n baie spesiale DZL-dag in November,”verduidelik Wiaan.

HOU DIE SPASIE FYN DOP VIR GEREELDE OPDATERINGS EN WENNERS

Die manne van DZL het die week by Musica Kolonade gekuier. Die wenner vir die week van 21 Julie is die 13-jarige Ole Smith. Saam met Ole en DZL op die foto onder is sy sussie en Sya Potgieter, Andries se vrou, en DZL se bestuurder. FOTO:Verskaf

Roelien Pienaar is die wenner van DZL se besoek aan Musica in die East Rand Mall in Boksburg op 28 Julie. FOTO: Verskaf

Die manne het vandeesweek besoek afgelê by die Musica in die Mooirivier Mall op Potchefstroom. Mareli Smit is die wenner. FOTO: Verskaf

Die drie maande lange toer sluit besoeke op dorpe soos Pretoria, Boksburg, Middelburg, Nelspruit, Potchefstroom, Vereeniging, Hartebeespoortdam en Welkom in.

“Ons vergeet beslis nie van ander dorpe nie en sal ook later die jaar by die kusdorpe soos Port Elizabeth en Kaapstad ’n draai maak,” vertel Andries.

Die toer is daarop gemik om DZL se nuwe album, Realiteit, bekend te stel wat onlangs op die rakke verskyn het. Die tweede album bestaan uit ’n kombinasie van opgewekte deuntjies en hartroerende ballades en beloof om aanklank te vind by oud en jonk. Die tiensnit album bevat oorspronklike liedjies, waarvan twee deur die sangpaar self geskryf is, en sluit ook drie duette asook verwerkings van ou gunstelinge in.

LEES OOK: ’n Nuwe album sonder tierlantyntjies vir DZL

Die aanslag op DZL se nuwe album is vars en nuut en is beslis, soos ’n wafferse ontwerpersitem, iets waarsonder geen musiekliefhebber se versameling volledig sal wees nie.

DZL, wat teen die einde van 2015 gestig is, is nie jou gewone manssangroep nie, want hierdie twee talentvolle manne kan iets van alles doen. Beide is professionele modelle en het ’n groot hart vir die natuur en renosters.