BBS Records (2018)
[yasr_overall_rating]
Hugo Niewoudt se vyfde album, Net soos die sneeu wat in Augustus vanjaar bekend gestel is, bied nes al sy voorgangers ’n mengsel van strelende pop, rock en country melodieë wat beslis harte gaan verower. Dié inspirerende album beloof om nie net luisteraars se voete behoorlik te laat jeuk nie, maar om hulle elkeen ook opnuut weer introspeksie te laat doen. Dit volg op die sukses van sy vorige album, Want jy glo in my waarop die bonussnit, Ek wil lewe vir môre ’n reuse treffer vir hom opgelewer het.
Die blou kleurskema waarvan daar oorheersend in die album se omslag ontwerp deur Marlette Kruger gebruik gemaak word, dien as vooruitwysing na natuurverskynsels soos reën, storm, wolke en sneeu wat in van die snitte daarop ter sprake kom. Werner Beukes en Derick Lennox slaag met hulle meesterlike kitaarspel nie slegs daarin om Hugo se musikale styl te komplementeer nie, maar ook om die geloofwaardigheid van elke liedjie se storie te verhoog.
Werner Beukes van Glow Star Entertainment het ook die vervaardiging en verwerking van alle snitte op dié album behartig sowel as die meeste liedjies daarop self geskryf. Johan Brits, Rudi Claasse, Mari Bosman en Michael Lindt, insluitende Hugo self het ook elkeen ‘n liedjie tot sy album bygedra.
Die emosiebelaaide titelsnit, Net soos die sneeu vertel van hoe ’n man verbete bly vasklou aan die belofte wat sy pa destyds as klein seuntjie aan hom gemaak het dat hy na die oorlog na hom sou terugkeer. Die eerste enkelsnit vanaf hierdie album, Toekomsbladsy vergelyk die nuwe hoop na seerkry in verhoudings met ’n nuwe skoon bladsy wat wag om gevul te word. Ander potensiële treffers sluit in Die Legende, Oor Berge en Dale, Oorlogkamer, Vat Vas, Bietjie Meer as Liefde en Trompie.
The Better Man wat die enigste oorspronklike Engelse snit op die album is, moedig luisteraars aan om die potensiaal binne hulleself uit te leef en om in die proses ’n beter weergawe van hulself te word. Die heel grootste verrassing op Hugo se album is egter sy en Lianie May se duet, Ou Gevoelens wat vertel hoe al die ou gevoelens opnuut weer begin opvlam tussen twee vriende wat mekaar na soveel jare weer raakloop. Die Have I Told You – Medley bestaande uit nuwe verwerkings van immergroen treffers soos Have I told you lately that I love you, Footloose, Some girls need love en Crazy little thing called love sluit dié positiewe album op ’n hoogtepunt af.
Hugo Niewoudt met sy treffende baritonstem wat plek-plek aan die van platinumster, Manie Jackson herinner, sorg oudergewoonte vir ’n aangename luisterervaring oor die liefde en die lewe. Hy steun egter nog steeds grotendeels op sy reeds bestaande suksesresep waarin verskeie lewenswaarhede nie net in beeldryke lirieke gestalte vind nie, maar terselfdertyd ook deur aansteeklike ritmes verskans word. Net soos die Sneeu met sy motiverende lirieke en melodië sal beslis aanklank vind by enigeen wat al ooit in die verskillende seisoene van die lewe verlief, verlore of verdwaal geraak het.