FOTO: Verskaf
Hulle mag dalk hulself ’n paar maande van die jaar in ander dele van die wêreld bevind het, maar Suid-Afrika se aantreklikste sangduo se harte is in Afrika en meer spesifiek – Suid-Afrika.
DZL, wat bestaan uit Andries Hendrik Potgieter en Wiaan Fourie, het pas hulle nuwe enkelsnit en musiekvideo, My Afrika, bekendgestel.
Dié enkelsnit is uit die pen van die skrywer, Rouxan Cloete, wat ook vir baie van die snitte op DZL se Realiteit album verantwoordelik is. My Afrika herhinner die luisteraar waarom Afrika altyd ons huis sal bly.
“My Afrika bevestig net dat ons elkeen iets het om aan vas te hou en dat ons moet dankbaar wees vir wat ons het. Al lyk dit soms nie baie nie, het ons genoeg. Ons het Afrika,” verduidelik Wiaan.
2018 was ’n moeilike jaar vir Suid-Afrika in baie opsigte en baie mense word met uitdagings soos die swak ekonomie, beurtkrag en moeilike huisomstandighede gekonfronteer. Hierdie en nog vele ander kwessies is genoeg om enige mens negatief in te stel of selfs te laat voel dat dit tyd is om jou tasse te pak en groener weivelde te soek.
“Ek dink jy gaan jok as jy sê jy word nie negatief deur hierdie uitdagings beïnvloed nie, maar ons moet onsself herinner aan die feit dat die Here groter is as die probleme wat ons land ondervind. Ons moet nog steeds met opgewondenheid aan nuwe geleenthede werk en weet daar is ’n belofte wat vir ons wag. Dis maklik om ons blind te staar teen daaglikse moeilikhede, maar as ons eerlik is weet ons, ons land is uniek en ons liefde vir Suid-Afrika en Afrika kan niemand van ons af wegneem nie,” sê Andries.
Die manne van DZL kan nie uitgepraat raak oor dit wat hulle van Afrika bekoor.
“Ons mooiste is die diereryk, die mensdom en die goedheid wat in ons kultuur, bos en samelewing vasgevang is.”
Die nuwe musiekvideo vervat ook van die mooiste Afrika-tonele wat mens sommer hoendervleis gee.
Kyk die musiekvideo hier:
“God se skepping is so verheerlik in hierdie video, jy kan dit sien wanneer diere beweeg, wanneer hulle hardloop en trek na groener vlaktes. In die video wys ons hoeveel diere jaarliks na nuwe gedeeltes trek. Selfs die plaas diere word aangejaag na nuwe en vars weiding. Die video is daarom simbolies dat daar hoop is en dat ons altyd iets het om aan vas te hou met die Here as ons rigtingwyser tydens moeilike tye,”verduidelik Andries.
En wat hou die nuwe jaar vir DZL in? Hulle het onlangs hande gevat met Gameways om ’n studiebeurs ter waarde van R19 750 beskikbaar te stel.
LEES OOK: Wen ’n studiebeurs met DZL en Gameways
“Hierdie projek lê ons baie na aan die hart want nie net skep ons bewusmaking rondom die geleenthede binne die land se natuur- en toerismebedryf nie, ons gee ook vir iemand die geleentheid om sy of haar passie uit te leef en ʼn toekoms vir hulself te bou,” vertel Andries. “Die lewe is so negatief en baie mense is bekommerd oor hulle toekoms. Met hierdie projek wil ons veral jongmense wys dat daar soveel groei binne hierdie spesifieke bedryf is en dat hulle ʼn suksesvolle loopbaan hiervan kan maak.”
In Januarie gaan die gelukkige wenner voltyds vir drie weke lank ʼn wildplaasbestuurkursus by Gameways saam met die DZL-manne by te woon. Gameways is bekend vir hulle omvattende en praktiese kursusse wat toekomstige wildplaasbestuurders voldoende opleiding gee in al die belangrike fasette waaruit wildplaasbestuur bestaan. Gedurende die drie weke opleiding gaan die DZL-manne en die wenner onder andere meer leer oor wildvang, finansies, habitat, genetika, voeding, hoe om wild hans groot te maak, siektes, nadoodse ondersoeke en vele meer.