Bobby en Vriende Bootreis: ‘Beste kuier ooit!’

FOTO: Verskaf

Vanaf 1 tot 4 Februarie 2019 gaan Bobby van Jaarsveld saam met vyf van sy vriende – Karlien van Jaarsveld, Stefan B, Leah, Willem Botha en Tussen Sterre – op die splinternuwe MSC Musica van Durban na die Portuguese Eiland vaar. En die goeie nuus, jy word as eregas genooi om saam te kom vaar op die ‘beste kuier ooit’.

SKRYF IN: Wen ’n Tussen Sterre-geskenkpak

Bobby, wie se ma en bestuurder Ronel Brink, met die idee van ’n konsert-bootreis voorendag gekom het, sê dat hy gewoonlik vriende kry wat ’n lekker show kan gee en voel beslis dat dié vriende in die kol is. “Ek’s bly sy het met die idee na vore gekom, want dit bly een van die lekkerste gigs van die jaar,” vertel Bobby.

Diegene wat reeds hul kajuit bespreek het kan uitsien na ’n volgepakte program. Op Vrydag, 1 Februarie skop die program met ’n sokkie saam met Stefan B, Leah, Willem Botha en Tussen Sterre af. Op Saterdag, 2 Februarie gooi die skip anker af op die Portuguese Eiland – ’n eilanddag met watersport en mengeldrankies is op die program, waarna daar die aand ’n heerlike tropiese partytjie op die dek aangebied word. Sondag, 3 Februarie sluit die broer en suster, Bobby en Karlien van Jaarsveld, die program af in ’n ‘state of the art’-teater met ’n vol orkes.

“Die sokkie, wat Vrydagaand plaasvind, is ’n nuwe toevoeging en ek dink dit gaan lekker wees,” vertel Bobby oor dié reis wat vir ’n derde keer aangebied word.

Huiwer jy egter nog om jou kajuit te bespreek? “Hierdie is die beste en lekkerste kuier ooit! Jy kan ontspan vandat jy voete op die skip sit totdat jy afklim. Dit is pret van begin tot einde,” motiveer Bobby.

Besprekings vir die Bobby en Vriende Bootreis is nóú oop. Skakel 087 075 08 05 of klik hier – met jou bespreking dui aan: Bobby & Vriende/Friends Theme Cruise.