Geraldine Scholtz soek die perfekte ‘Iemand’ in nuwe video

FOTO: Verskaf

Kort na die vrystelling van haar nuutste enkelsnit, Iemand, is Suid-Afrika se gunsteling-blondekop, Geraldine Scholtz, terug met ’n musiekvideo wat hierdie treffer soos ’n handskoen pas.

Gerhard van Rooyen van GVR Productions het die video in die Hazelwood-area in Pretoria verfilm. “Dit gaan oor ’n meisie, met ’n gebroke hart, wat in die stad aankom met die hoop om die perfekte een te ontmoet. Die ontvangsdame hoor die gesprek met haar ma en pa dat sy Iemand’ gaan ontmoet, ‘’n man soos haar pa’. Die vrou gee dan vir haar ’n sjokolade, min wetend dat dit haar lewe gaan verander. Kykers kan ook ’n baie interessante einde verwag, wat ons oop gelaat het vir interpretasie,” verklap die kunstenaar, wat self die storielyn hiervoor geskep het, opgewonde.

“Die video begin met ’n inleiding, iets wat ek baie graag wou inhê. Verder sluit die storielyn aan by die lirieke van die liedjie, wat dit nog meer spesiaal maak. Ek het dit vreeslik geniet om die musiekvideo aan mekaar te sit.”

Dié popliedjie, wat deur Johan Oberholzer geskryf en deur Robin Kielly vervaardig is, wat uit die staanspoor goed ontvang is, het reeds ’n draai gemaak op verskeie radiostasies en is klaar ’n gunsteling by haar konserte. Volgens die sangeres gaan die liedjie daaroor om te wag vir die perfekte een saam met wie jy die res van jou lewe wil spandeer.

LEES OOK: Geraldine Scholtz is terug met ’n nuwe snit

“Dit is vir my belangrik om iets te sing wat in my hart is en waarvan ek ook sal hou. Ek hoop dit kan jou laat dans soos wat ek dans wanneer ek die liedjie hoor en ek hoop wanneer dit speel sit die enkelsnit ’n groot glimlag op jou gesig,” sê sy.     

Geraldine het ’n opwindende jaar agter die rug met, onder andere, ses vertonings by Innibos, ’n optrede by Weiveld, asook drie suksesvolle radiovrystellings, Sommer, Mis en Iemand. Sy beskou die vrystelling van haar nuutste musiekvideo as ’n groot hoogtepunt en beplan nog baie groot dinge vir die toekoms.

“Ons het van vroegoggend tot middernag aan die video geskiet en dit was uit-en-uit die moeite werd. Ek hou daarvan om my eie konsepte uit te dink en my eie kreatiwiteit te gebruik en Gerhard het my mooi aangevul waar nodig,” vertel die ster.

Alhoewel sy met ’n paar blase op haar voete weggestap het, is die eindresultaat perfek, en sal Iemand se musiekvideo aanhangers weer van vooraf laat verlief raak op Geraldine Scholtz se besonderse talent.

Kyk die musiekvideo eksklusief hier: