FOTO: Verskaf
As jy al ooit gevoel het dat jy van iemand hou, maar nie jou gevoelens in woorde kan sit nie, is die sanger Dirk van der Westhuizen se splinternuwe enkelsnit, Net So (Mmm), net vir jou!
Dié kontemporêre dansliedjie uit die pen van die bekroonde skrywer Johan Oberholzer gaan daaroor om op iemand verlief te wees, maar nie die regte woorde het om die gevoel binne jou te beskryf nie. “Soveel keer gebeur dit dat mense van mekaar hou, maar hulle het net nie die woorde om te beskryf hoe hulle oor mekaar voel nie,” sê Dirk.
Volgens die sanger het hy juis op dié liedjie as sy volgende enkelsnit besluit omdat dit altyd ’n glimlag op sy gesig sit en hy voel die publiek sal beslis daarmee kan vereenselwig. “Ek dink baie mense van die publiek gaan hulself in daardie posisie kan plaas want almal van ons het op een of ander stadium nie woorde gehad vir iemand wat so met ons toor nie!” Die opgewekte goedvoel-liedjie sal enige iemand, jonk of oud, laat saam sing én dans.
Die musiekvideo vir Net So (Mmm) is deur Christiaan Wolf van Brick Wolf Productions opgeneem en vervaardig. Die video is tydens Dirk se albumbekendstelling by die Afrisaam Fees op Springs geskiet. Die gehoor kon lekker saam sing en dans in die video en die gevoel van passie is elektries. Oor dié konsep, wat ’n ongelooflike ervaring vir Dirk was, vertel hy: “Dit is om vir die publiek ’n voorsmakie te gee van wat by my vertonings gebeur en die energie wat gepaard gaan daarmee op die verhoog.”
Kyk die musiekvideo hier:
Dirk vertel dat hy graag ’n positiewe gevoel deur sy musiek wil oordra. Verder brei hy uit: “Ek wil graag hê my musiek moet mense net gelukkig laat voel en laat besef dat hulle elkeen uniek en wonderlik is.”
LEES OOK: Dirk van der Westhuizen blus die koue met ’n ‘sexy’ nuwe treffer
Vra jy hom uit oor die toekoms antwoord hy: “Om te loop waar God my lei, my lewe en toekoms is in Sy hande.” Vra jy dieselfde vraag vir sy aanhangers, is hulle van mening dat Dirk net nooit moet ophou sing nie en kry hulle net eenvoudig nie genoeg van hom nie. Vir Dirk is sy aanhangers soos familie en wil hy hulle graag net trots maak en gelukkig laat voel.
Net So (Mmm) is op Dirk van der Westhuizen se nuwe album Sexy Vi My, wat landswyd in musiekwinkels asook op digitale platforms soos iTunes en JOOX, beskikbaar is.