Oops! It appears that you have disabled your Javascript. In order for you to see this page as it is meant to appear, we ask that you please re-enable your Javascript!

Dirk van der Westhuizen blus die koue met ’n ‘sexy’ nuwe treffer

FOTO: Verskaf

Eers is daar suiker gegooi, toe spoel hy dit af en nou gaan Dirk van der Westhuizen die koue blus met sy nuwe vuurwarm enkelsnit getiteld Sexy Vi My.

Die enkelsnit, wat ook die titelsnit van Dirk se nuutste album is, is ’n Afrikaanse pop/dansliedjie wat enigiemand sexy gaan laat voel. “Hierdie is definitief ’n liedjie wat jy op die dansvloer uit volle bors gaan saam sing en jy gaan hotter as botter voel,” vertel die sanger en lag nederig.

Die liedjie is deur die talentvolle Johan Oberholzer geskryf. Talle treffers kom reeds uit Johan se pen. Oor die storie agter die liedjie sê Dirk: “Soveel mense se daaglikse lewens is gevul met prioriteite en verantwoordelikhede dat dae, maande en selfs jare net verby hul gaan sonder enige me time en feel good time. Ek hoop die liedjie gaan dit verander.”

Volgens Dirk het hy die liedjie as sy volgende enkelsnit gekies omdat dit belangrik is om mense spesiaal te laat voel, en hy kry dit hoeka reeds reg. “Ek sing die liedjie gereeld by my optredes en mense ontvang dit goed. Ek glo enige iemand met ’n lus vir die lewe, wat ’n bietjie openminded is, sal die liedjie geniet.”

En wat is ’n sexy liedjie sonder ’n sexy musiekvideo? Die musiekvideo, wat deur Christiaan Wolf van Brickwolf Productions opgeneem is, speel af by Dirk se huis en het ’n tropiese gevoel. “Ons het die hele huis verander in ’n tropical house party met palm bome en helderkleurige ligte. Ek en my dansers doen ook ’n Sexy Vi My-dans. Daar is ook tonele waar ek met ’n mooi meisie flirt, vir haar sing, swem en om die swembad kuier. Ek dink dit gaan ’n lekker partytjie-video wees,” sê hy. En ja, die hemde gaan waai. “Ek hou mos daarvan om kanse te vat en voluit te leef,” skerts Dirk.

Kyk die musiekvideo hier:

 
Dirk van der Westhuizen is in Pretoria gebore en sing al vandat hy kan onthou. “As kind het ek elke naweek optredes in my kamer vir die familie gehou. Om te sing en mense te inspireer is deel van my DNA – dis wie ek is en al wat ek nog altyd wou doen,” sê hy.

Dirk is reeds nege jaar in die musiekbedryf doenig en spog met drie suksesvolle albums, ’n rits treffers en meer as ’n twee miljoen YouTube-trefslae. Hy sonder elke vertoning, gesig wat ophelder en saam sing, elke pakkie of sakkie suiker wat hom tref en elke ontmoeting met mense wie se harte hy kon aanraak as hoogtepunte in sy loopbaan uit.

Hy put inspirasie uit ander plaaslike musikante en sê dat hy graag ‘n lied saam met Karlien van Jaarsveld sal wil opneem. Hy noem dat as hy nie ‘n sanger was nie, sou hy ’n persoonlike afrigter wou wees. “Ek het ’n baie groot liefde vir fiksheid en om mense in die beste weergawe van hulself te verander en te motiveer. Om fiks te wees is soveel meer as net n mooi lyf – dis ’n gevoel van vryheid en selfvertroue.”

Dirk hou daarvan om liedjies te skryf wat met die hart praat. Volgens Dirk moet hy homself op die verhoog daarmee kan sien voor dat hy dit goedkeur. “Meeste van die tyd skryf Johan Oberholzer of Vaughan Gardiner regtig mooi liedjies. Ek skryf ook baie van my liedjies self en probeer maar lirieke inwerk waarmee mense kan vereenselwig, maar steeds buite die norm is,” vertel hy.

En nes sy vorige musiek gaan Sexy Vi My iets wees waarby mense aanklank kan vind. “My musiek moet iets in mense wakker maak wat vrede, vreugde en ’n gevoel van geluk bring. Ek wil hê mense moet met toe oë en oop arms die musiek kliphard saam sing en vergeet van alles wat pla en net super happy voel.”

Dirk luister graag na Britney Spears omdat sy ’n groot invloed op hom gehad het as kind en lewe graag met die musiek leuse: “Wanneer woorde opraak sal liedjies verder praat.” Hy beskryf sy musiek as feel good met ’n goeie boodskap of ’n bietjie humor. Hy sal ook graag eendag aanhangers aan sy stem vir ballades wil voorstel…

En wat weet sy aanhanger nie van hom nie? “As ek nie by een van my eie vertonings is nie – is ek bitter skaam tussen mense en voel baie vinnig uit,” vertel hy. En die grootste les? “Dat enige iets wat maklik kom net tydelik is. Jy moet werk vir dit waarin jy glo en moenie op enige iemand staatmaak behalwe jouself nie. ’n Aanhouer wen! Moet nooit in jouself twyfel nie en moet nooit jou lewe en loopbaan met ’n ander sin vergelyk nie. Elke persoon is uniek dus het God ’n unieke plan vir ons almal. En ja, daar is beslis ’n plek in die son vir almal.”

Sy dagboek is reeds volbespreek en hy wil graag mense regoor Suid-Afrika aan sy nuwe album voorstel. Dirk is druk besig om te oefen vir die Afrisaam Fees op 8 en 9 Junie in Springs, waar sy nuwe album eksklusief vrygestel gaan word. Die album sal ook op digitale platforms asook in die musiekwinkels beskikbaar wees, en deur Coleske Artists versprei word.