FOTO: Deon van Wyk
Ná twee suksesvolle aflewerings van Bobby en Karlien van Jaarsveld se unike musiekproduksie, In Ons Skoene – in Johannesburg en Kaapstad – kan inwoners van Polokwane hul vere reg skud vir die broer en suster.
Die konsert, wat slegs vir ’n beperkte aantal vertonings beskikbaar is, vind 27 September by Bolivia Lodge in Polokwane plaas.
Konsertgangers kan uitsien na verskeie treffers van Bobby en Karlien, ’n paar gunstelinge en ’n intieme blik op hul lewens in die kollig.
Die produksie is 90 minute lank en sluit ’n vyf-stuk orkes in. “Die produksie beloof om konsertgangers op ’n reis in Bobby en Karlien se skoene te neem, en ’n ander sy van hul te ontdek,” sê Wian Smith, organiseerder van die produksie.
LEES OOK: Bobby en Karlien-produksie binnekort in Pretoria
“Konsertgangers kan verseker wees om ’n spesiale aand vol verrassings te verwag.”
Beide het reeds diep spore in die vermaaklikheids wêreld getrap. Hulle het al hoofrolle in flieks en musiekblyspele vertolk en natuurlik spog Karlien met die Strictly Come Dancing-troffee en Bobby as een van die The Voice SA-afrigters.
Kaartjies wissel tussen R150 en R180 en kan gekoop word by die Ocean Basket in Savannah Mall. Vir enige navrae, stuur ’n Whatsapp-boodskap na 083 726 1180.
Die vertoning word met trots in samewerking met Beeld en Pretoria FM aangebied.