Oops! It appears that you have disabled your Javascript. In order for you to see this page as it is meant to appear, we ask that you please re-enable your Javascript!

DZL trakteer ondersteuners met ’n dag vol avontuur

FOTO: The Grey Owl Photography

Ondersteuners van die sanggroep, DZL, is onlangs   met ’n avontuurdag van ’n leeftyd getrakteer. Die manne het in April hulle nuuste enkelsnit, Het Jy Al Gelewe vrygestel waartydens hulle met radiostasies regoor die land saamgewerk het en luisteraars uitgedaag het om hulle stories te vertel waartydens hulle as’t ware die lewe by die horings gepak het.

Het Jy Al Gelewe, die eerste enkelsnit vanaf DZL se nuwe album, Realiteit,  is ’n lekkerluister country-popdanstreffer wat gaan oor die vreugde van die lewe en om elke oomblik saam jou beste pêl of geliefde te geniet.

LEES OOK: ’n Nuwe album sonder tierlantyntjies vir DZL

“Ons het sulke wonderlike terugvoer van die luisteraars gekry en het toe die beste stories gekies en hierdie luisteraars, saam met hulle deelnemende radiostasies genooi om ’n dag vol avontuur saam met ons te spandeer,” vertel Wiaan Fourie.

Op Saterdag, 12 Mei, het die wenners en die ondersteunende radiostasies wat Pretoria FM, Bosveld Stereo, 90.6 VCR, Overvaal Stereo, East Rand Stereo en ander ingesluit het, ’n dag van avontuur by Akwaaba Predator Park buite Rustenburg geniet. Die park het van die grootste verskeidenheid predatore soos leeus, tiere en hiënas en spesialiseer in die beskerming van hierdie diere.

“Soos almal weet is ons mal oor diere en beywer ons altyd om dierebewaring aan te moedig. Ons wou graag ons wenners en die radiostasies met ’n avontuur trakteer maar terselfdertyd ook inlig oor wat Akwaaba doen om hierdie diere te beskerm. Akwaaba stel homself ten doel om bedreigde spesies te beskerm en vir toekomstige generasies te bewaar,” vertel Andries Potgieter.

En wat sal die bloed vinniger deur die are laat vloei as om van aangesig tot aangesig met ’n volgroeide leeu te kom?

“Ons het omtrent gelag vir baie van die wenners se reaksies toe hulle van naby kennis maak met die koning van die diereryk! Hulle het beslis hierna geweet hulle het al gelewe!” lag Andries.

LEES OOK: DZL se nuwe enkelsnit is ‘avontuurlustig’

Natuurlik is daar ook lekker geëet en gekuier! Lionel Motors in Rustenburg het vir die vervoer van die gaste gesorg tydens die dag by Akwaaba en die aksie oomblikke is deur The Grey Owl Photography vasgevang.

Blaai hier deur ’n foto-album:

Het Jy Al Gelewe verskyn tans op talle radiostasies se trefferparades en is ook op DZL se album, Realiteit, beskikbaar wat nou in musiekwinkels en op digitale platforms soos iTunes te koop is.

DZL, wat bestaan uit Andries Hendrik Potgieter en Wiaan Fourie, se tweede album bestaan uit ’n kombinasie van opgewekte deuntjies en hartroerende ballades en beloof om aanklank te vind by oud en jonk.