DZL se nuwe enkelsnit is ‘avontuurlustig’

HOOFFOTO: Francois Olivier

Die manne van DZL word daaraan geken dat hulle nie iets op die gewone, tradisionele manier doen nie. Dit blyk duidelik met die bekendstelling van hulle nuwe enkelsnit Het Jy Al Gelewe, wat vandag, 23 Maart 2018, op radiostasies regoor die land vrygestel word.

Die manne het ook ’n lekker verrassing vir hulle ondersteuners; die publiek kan ’n avontuur saam met Andries en Wiaan los slaan.

Lede van die publiek word uitgenooi om hulle stories te vertel waartydens hulle die lewe as’t ware by die horings gepak het. Die beste stories wen dan ’n avontuurlustige uitstappie met die twee manne.

“Ons hou mos daarvan om altyd iets mal aan te vang wat die bloed deur jou are laat bruis en daarom gee ons lede van die publiek die geleentheid om so ’n avontuur met ons mee te maak,” vertel Andries.

Het Jy Al Gelewe, die eerste enkelsnit vanaf DZL se nuwe album, Realiteit is ’n lekkerluister country-popdanstreffer wat gaan oor die vreugde van die lewe en om elke oomblik saam jou beste pêl of geliefde te geniet.

Luister hier na ’n voorskou van die snit:

LET WEL: Hierdie is slegs ’n voorskou. Vir die volledige snit luister na jou gunsteling radiostasie. 

Die musiekvideo van die snit, wat ook eerskomende Maandag op SABC 2 se Kliphard-program bekendgestel word, is in Thailand verfilm en sal aanhangers inspireer om ’n tassie te pak en te gaan kyk wat die lewe het om te bied.

“Die lewe is ernstig en ons almal is op soek na iets wat jou ’n wegbreekkans kan gee. Hierdie is daardie tipe liedjie wat jou vir ’n oomblik kan wegvoer na ’n plek van ontsnapping en jou sal uitnooi om lighartig saam te sing,” verduidelik Wiaan.

DZL se nuwe album word in April landwyd vrygestel asook op digitale platforms.