Die manne van DZL se nuwe musiekvideo vir hul eerste enkelsnit Het Jy Al Gelewe, vanaf hul jongste album, laat jou sommer lus voel om jou tas te pak en ’n nuwe avontuur aan te pak!
Die video is Maandag, 26 Maart, eksklusief op SABC 2 se Kliphard bekendgestel.
Kyk die video hier:
DZL word daaraan geken dat hulle nie iets op die gewone, tradisionele manier doen nie. Dit blyk duidelik met die bekendstelling van hulle nuwe video waarvan sommige tonele in die prentjiemooi Thailand geskiet is.
“Ons hou mos daarvan om altyd iets mal aan te vang wat die bloed deur jou are laat bruis en toe ons onlangs in Thailand gekuier het, het ons die geleentheid gebruik om alles wat ons beleef het in ’n musiekvideo te vervat,” vertel Andries Potgieter.
Die liedjie is ’n lekkerluister country-popdanstreffer wat gaan oor die vreugde van die lewe en om elke oomblik saam jou beste pêl of geliefde te geniet. Die enkelsnit is verlede week uitgereik op radiostasies reg oor die land.
LEES OOK: DZL se nuwe enkelsnit is ‘avontuurlustig’
“Die lewe is ernstig en ons almal is op soek na iets wat jou ’n wegbreekkans kan gee. Hierdie is daardie tipe liedjie wat jou vir ’n oomblik kan wegvoer na ’n plek van ontsnapping en jou sal uitnooi om lighartig saam te sing,” verduidelik Wiaan Fourie.