kykNET het onlangs bekend gemaak dat die sangeres en aktrise, Leah, die leisels by Minki van der Westhuizen as Boer Soek ’n Vrou-aanbieder sal oorneem.
LEES OOK: Nóg ’n wonderwerk vir Leah
Dit volg nadat Minki verlede maand aangekondig het dat sy nie meer die program gaan aanbied nie. Minki het die program verlaat as gevolg van logostiek rondom haar derde kind se geboorte. Sy en haar man Ernst verwag hul derde bondeltjie in Maart.
Leah sal die volgende seisoen van Boer Soek ’n Vrou aanbied en die vyfde aanbieder van dié program wees, wat sedert 2007 op die kassie is.
“Leah is ’n bekroonde kunstenaar en het al talle musiekpryse soos die Ghoema Nuweling van die Jaar-toekenning in 2016 en talle Huisgenoot Tempo-toekennings ingepalm. Deesdae is sy ook ’n aktrise in die kykNET-film Susters,” lui ’n verklaring van kykNET.
Leah volg in Minki se voetspoere wat die laaste twee jaar boere regoor die land besoek het.
Volgens Leah is sy reg vir die plaas en is dit vir haar ’n droom wat waar word om Boer Soek ’n Vrou aan te bied. “Ek weet ek het groot skoene om vol te staan, maar ek is nie bang vir ’n uitdaging (of vir ’n bees, ’n skaap of ’n boer) nie,” sê sy.
“Ek sien baie uit om mense se lewe moontlik met die liefde te verander.”
Volgens die verklaring is Minki tevrede met die nuwe gesig van die nuwe seisoen. “Deelnemers en kykers gaan beslis aanklank vind by Leah, want sy is ’n opregte mens,” het Minki gesê.
Leah se nuwe album word in Maart maand vrygestel.