’n Ekstra Classics is Groot-konsert word Saterdag, 24 Junie om 12:00, ten bate van diegene wat deur verwoestende brande in Knysna geraak is, aangebied.
Hierdie nuus is pas deur Classics is Groot se vervaardigers bekendgemaak. Volgens Brendon Hargroves, uitvoerende vervaardiger van dié konserte, het alle rolspelers ingestem om hul dienste gratis hiervoor te bewillig.
“Die ekstra konsert se opbrengs word aan organisasies geskenk wat help om verligting in die area te bring. Ons het besluit om alle kaartjies vir die ekstra konsert, teen R250 te verkoop. Dit is ons manier van omgee en om die mense van Knysna te ondersteun,” sê Hargroves.
“Ons nooi alle musiekliefhebbers om hierdie konsert van wêreldgehalte te ondersteun en sodoende ook aan dié liefdadigheidsprojek deel te neem,” sluit Hargroves af.
Brande het die afgelope paar dae geweldige verwoesting in Knysna en omliggende areas gesaai en te midde van lewensverlies, is verskeie besighede en huise in puin gelê, wat talle mense dakloos gelaat het.
Dít is ’n saak wat vir Corlea, wat by Classics is Groot te sien is, baie na aan die hart lê. “In 1995 het ons huis tot op die grond gebrand, ons het net die klere aan ons lywe oorgehad. Ons het so verlore en haweloos gevoel. My hart gaan uit na hierdie arme mense, wie se wêreld totaal omgekeer is. Help my, en my mede-kunstenaars, om net ’n klein bietjie hoop en verligting in dié onsekere tye aan hulle te bring,” vra sy.
Saam met Corlea op die verhoog, kan konsertgangers uitsien na optredes deur Amira Willighagen, Jannie Moolman, Coleske, Touch of Class, Swing City, Monique Steyn, Tarryn Lamb, Charl du Plessis en die Joburg Ballet Company.
Kaartjies vir dié ekstra konsert (Saterdag, 24 Junie om 12:00) is vanaf 15:00 beskikbaar by www.ticketpro.co.za teen R250 per persoon beskikbaar.