Classics is Groot is terug!

Tydens Afrikaans is Groot 2016 kon gehore in ’n neutedop ’n aptytwekker kry van die nuutgevonde produksie Classics is Groot. Die reaksie was oorweldigend en die Nederlandse kinderster Amira het harte gesteel. Selfs Jannie Moolman se uitvoering van Kalinka, en natuurlik Touch of Class se weergawe van Sound of Silence het gehore se asems weggeslaan, met Ruhan se uitmuntende vertolking van hierdie klassieke pop-treffer.

Die goeie nuus is dat Classics is Groot terug is in Pretoria op 23 en 24 Junie 2017 met musiekoomblikke, en items wat jou na jou asem gaan laat snak. ’n Uitreksel uit The Phantom of the Opera, Elvis Presley se klassieke American Trilogy, Pie Jesu en Queen se klassieke The show must go on, is maar net van die betowerende oomblikke wat wag.

Dis ’n kleurvolle viering van musiek – van ikoniese pop-treffers tot legendariese klassieke werke.


Nóg goeie nuus is dat die Nederlandse sangsensasie, Amira en die fantastiese Touch of Class weereens die verhoog sal deel met die geliefde en uiters talentvolle Corlea Botha en Jannie Moolman wat vir vele hoendervleis-oomblikke wat jou gaan laat glimlag, die trane laat loop en vir warm harte gaan sorg.

Ook op die verhoog is die Amerikaanse sanger Joseph Clark, bekend vir sy uitmuntende vertolkings van Freddie Mercury se Queen at the Opera, die gewilde Tarryn Lamb (van die sanggroep Blackbyrd), en vir die eerste keer in ’n langtyd sal die superduo Coleske wat in die 90’s bekend was vir wêreldtreffers soos My Only en Take me where the sun is shining weer lewendig gesien word met hul ongelooflike harmonieë.

’n Hoogtepunt wat ’n eerste vir Pretoria-gehore sal wees, is die feit dat die wêreldberoemde Joburg Ballet Company ook te siene sal wees in ’n item, so reg in die kraal van die fynproewer.

Classics is Groot
Moet dus nie hierdie asemrowende geleentheid misloop nie! Met vele groot treffers uit die verlede, ’n wêreldklas simfonie-orkes saam met die bekende Akoestika-koor, en van die beste plaaslike en internasionale stemme, beloof Classics is Groot om jou op die voorpunt van jou stoel te hou.

Kaartjieverkope open Donderdag, 16 Maart om 10:00 en sal beskikbaar wees by TicketPro. Kaartjiepryse wissel van R350 tot R625.