ADAM: Hoogtevrees

Universal Musiek (2016)

ADAM se vierde Afrikaanse album, Hoogtevrees wat vroeër vanjaar bekend gestel is, beloof beslis om hulle aanhangers onverhoeds te betrap. Dit handel nie slegs oor die hoogtes wat twee mense in ’n liefdesverhouding moet oorkom nie, maar ook oor die hoër hoogtes wat hulle as ’n groep met hierdie album wil bereik. Hoogtevrees volg op die sukses van hulle vorige Afrikaanse album, Goud asook die gewilde kortspeler, Young and Wild wat verlede jaar saam met Daniel Baron uitgereik is.

ADAM se professionele, dog gemaklike styl in ’n drie-delige harmonie op hierdie grensverskuiwende album is deur die folk aanslag op popmusiek geïnspireer wat met ander pop- en country elemente vermeng word. Dit bestaan uit ’n versameling liefdesverhale waarin die hartseer, seerkry, teleurstellings en uitdagings wat dikwels só ’n groot deel van verhoudings uitmaak ook ter sprake kom. Die klassieke, dog tydlose gevoel van die album omslag deur Jacques Jay Loots van Fathom Media waarop dié drie manne stylvol die toekoms instaar, is deur Kyle Grant geïnspireer.

Dié album word afgeskop deur die proloog, ’n Nuwe Seisoen waartydens ADAM hulself bekend stel en die luisteraars uitnooi om dié nuwe seisoen in hulle loopbaan saam met hul binne te gaan. Die titelsnit, Hoogtevrees dien as ’n metafoor vir die kruispad van ’n romantiese verhouding waarin twee mense moet besluit of hulle die kans op liefde gaan waag, al dan nie. Die hartroerende lirieke wat binne ’n volwasse kontemporêre styl aangebied word, maak beslis van die snit, Vergifnis ’n onbetwiste hoogtepunt. Ander potensiële treffers op dié album is Plak Jou Hart Vas, Dis Al Wat Ek Het en Diep Uitgekerf. Die wêrelde van hoofstroom popmusiek en alternatiewe rockmusiek word moeiteloos byeen gebring op die snitte, Hartaanval, Dagdroom en Nostalgie (Soet September) om ’n meer alternatiewe klank tot stand te kan bring.

Die lirieke was ’n spanpoging tussen Hugo Ludik, Reynardt Hugo en Vaughan Gardiner met Kyle Grant, Nerine Gardiner, Hunter Kennedy en Pierre  Greeff wat hier en daar ook hand bygesit het. Dié driemanskap was ook in samewerking met Robin Kielly vir die programmering, verwerkings en klankmeng van al die liedjies op dié album verantwoordelik. Raymond Green, Hugo Ludik en Vaughan Gardiner blink uit op kitaar terwyl laasgenoemde ook die klavier bemeester het en Brendan Ross op die saksofoon gehoor kan word.

Hoogtevrees bevat die Afrivisie Top 14 Finalis, Die Idee Wat Tel sowel as twee verrassende duette, Wat Nou? met Vaughan Gardiner en Hel of Hoogwater met Die Heuwels Fantasties. Dié album word op ’n byna gewyde noot afgesluit met slegs klavierbegeleiding op een van wyle Koos du Plessis se tydlose treffers, As Jy My Kon Volg wat as die epiloog dien.

Hoogtevrees bied ongetwyfeld ’n verfrissende, individualistiese en nadenkende blik op die universele tema van liefde. Dié drie manne blyk vreesloos wanneer hulle die spreekwoordelike hoogtes aandurf waarvan hulle in die titelsnit sing deur met ’n opwindende, nuwe klank te eksperimenteer. ADAM vervolmaak inderdaad op hierdie album die kuns om gewone liefdesliedjies in alternatiewe musiekjuwele te omskep.

Leoné Prinsloo

Leoné het haar BA graad in Kommunikasiestudies asook Honneursgraad in Dokumentêre Videoproduksie beide Cum Laude aan die Noordwes Universiteit se Potchefstroomkampus behaal. Verder het sy ook ’n aanlynkursus in Sosiale Mediabestuur deur Get Smarter in samewerking met die Universiteit van Kaapstad voltooi.