FOTO: Willem Botha
Op 5 Oktober 2018 het Douvoordag (Ilse en Jattie de Beer) hul debuut-album, Die Avontuur, uitgereik en het dié album byna onmiddellik die nommer een posisie op iTunes ingeneem!
LEES OOK: ‘Die Avontuur’ begin nou vir Douvoordag
Hulle eerste enkelsnit vanaf die album getiteld, Manifes, is ongelooflik goed deur radiostasies landwyd ontvang en kan steeds gereeld op nasionale radio gehoor word terwyl die musiekvideo vir ’n geruime tyd op die kykNET Top 20 gepryk het.
Dié duo maak positiewe, hoopvolle en energieke musiek en het ’n eie en unieke klank wat musiekliefhebbers gaande het. Hulle tweede enkelsnit getiteld, Die Avontuur, word nou, gedurende die laaste week van Januarie 2019 aan radiostasies landwyd uitgereik en die musiekvideo vir hierdie treffende lied sal gedurende Februarie 2019 bekendgestel word.
“Die Avontuur nooi luisteraars om op te hou wag vir ’n beter lewe en die kanse te vat en dinge te doen waaroor jy nog altyd droom. Om ja te sê vir die avontuur, is om ja te sê vir hoop en nee vir berou en vrees – om in jou oudag terug te kyk en te kan sê ek het gelewe. So klim die berg, koop die vliegtuigkaartjie, vra haar om te trou, begin jou eie besigheid. Die avontuur begin nou,” sê Jattie.
Luister hier na ’n voorskou:
Die Avontuur is nou op alle digitale platforms en goeie musiekwinkels beskikbaar.