FOTO: Verskaf
Almal het daardie één pel: ’n vreemde karakter wat ’n bietjie ‘gevaarlik’ is om na ’n kuier te nooi – iemand wat nie volgens die reëls speel nie, maar wat groter as die lewe self leef en die vibe neem na waarookal hulle is, ’n risiko, maar op al die regter maniere.
Daardie iemand is Hammie en hy, sy snor, sweetpak en splinternuwe enkelsnit is hier om jou partytjie op sy kop te draai.
Bruce Lee is ’n elektroniese, tong-in-die-kies danssnit met meer skop as die konkoksie wat die oom van die mampoerstalletjie in sy agterplaas aanmekaarslaan – iets wat die partytjie-ninja in selfs die mees konserwatiewe siel sal losskud en enige kuier in een van die boeke sal omskep.
Daar’s tonne ritme, aansteeklike techno-klanke en effekte, lekker lirieke met ’n onblusbare energie en polsende bas wat jou tot in jou binneste sal roer en jou agterkwart spontaan aan’t beweeg sal sit.
Luister hier na ’n voorskou:
Dié snit, soos ander wat ons binnekort van Hammie te wagte kan wees, het ontstaan uit sy liefde vir goeie songs, stories en komedie – ’n idee wat êrens by ’n epiese, ietwat onverantwoordelike laataand-kuier begin het en gegroei het tot iets wat al wat ’n dansvloer wat sy sout werd is gaan verower – van dansplekke tot rampartytjies, skoolsokkies, matriekvakansies, braaie wat tot twaalfuur loop en enige iets tussenin.
Hammie beskryf homsef as ’n optimistiese kêrel met ’n positiewe uitkyk oor die lewe – hier om sy lewe te geniet en nie te veel te stres oor goed buite sy beheer nie. Hy hou daarvan om die goeie in mense raak te sien, positief te wees, te lag en ander te laat lag, al is dit met ’n goeie dosis corny.
Wanneer hy nie besig is om vuurwarm treffers te maak nie, sê hy: “Ek dans graag in my vrye tyd alleen by die huis en as ek nie dans nie maak ek nes ek wil, tot my vrou my bel en sê ek’s besig om twak aan te jaag, dan maak ek soos sy sê.”
Oor sy toekomsplanne is hy ’n toe boek, maar verklap wel dat wanneer hy ’n idee kry en daarin glo, hy dit met alle erns aangryp, dus kan aanhangers van die snit uitsien na meer.
Bruce Lee is ’n snit wat elke beskikbare radiogolf, luidspreker, oorfoon en verhoog pap gaan speel want in sy eie woorde is daar net een groep wat waarskynlik nie van sy musiek gaan hou nie: ‘dooie mense’!
Die enkelsnit is nou beskikbaar op alle digitale platforms.
Kyk die musiekvideo hier: