FOTO: Verskaf
Verona se debuut-album, Maskers, is vroeër in 2018 uitgereik en dié album lewer net treffer musiek op. Haar eerste enkelsnit, ook getiteld, Maskers, is baie goed deur radiostasies landswyd aanvaar en het ook die Nr. 1 posissie op 90.6 VCR se Top 20 behaal.
Nou, gedurende November 2018 word haar tweede enkelsnit, Sterker, uitgereik en dit gaan verseker mense laat regop sit. Dit is ’n kragtige kontemporêre pop liedjie, geskryf deur haarself en Hugo Ludik, vol motivering waarmee sy haar siel ontbloot en haar ongelooflike sangtalent net nog meer ten toon stel.
Die oorhoofse tema van haar album is motivering en inspirasie en Sterker het sy oorsprong uit die skryf en opneem proses gekry. “Ek voel of ek konstant besig is om myself in my liedjies aan te spreek en aan te moedig. Elkeen van ons het soms daardie ekstra motivering nodig om aan te gaan. Die musiekbedryf is ‘n moeilike industrie en enige kunstenaar vandag vat ‘n groot kans om die bedryf te betree. In hierdie liedjie bemoedig ek myself en die luisteraar om nie mismoedig te word nie en te weet dat moeilike tye jou net sterker en beter aan die anderkant sal uitbring,” sê Verona.
Luister hier na ’n voorskou:
Een van die mooiste lirieke in die liedjie is: “Vir leë beloftes wat die wêreld gee / Staan op en skree / Ek word… Sterker”. “Soms moet jy jou eie drome laat waar word. Jy moet die wonderwerk wees. God het jou die verstand, krag en talent gegee om hierdie droom te verwesenlik en jy sal moet hard werk daarvoor. Niks wat die moeite werd is, is verniet nie,” gaan sy voort.
Die publiek gaan beslis aanklank vind by hierdie liedjie want daar is nie ’n persoon op hierdie aarde wat nog nie deur ’n moeilike situasie of tyd in hulle lewe gegaan het of met iets geworstel het nie. As jy die dag Inspirasie soek en daardie ekstra oemf vir jou dag dan is Sterker beslis die liedjie wat jy kan luister om jou aan die gang te kry.
’n Musiekvideo vir hierdie liedjie word ook beplan en sal eersdaags uitgereik word. Sterker is beskikbaar op haar album Maskers en is aanlyn beskikbaar.