FOTO: Verskaf
Die gesegde lui nie verniet: “Twee is beter as een”, en juis vir daardie rede is daar opwinding in die lug oor die duo MWAH en Stephantasties wat onlangs kragte saamgesnoer het, met ’n splinternuwe enkelsnit.
Stephantasties wat al vir meer as 10 jaar in die musiekbedryf is en voormalige lid van die groep NRG is, het nie net met sy sang talent gespog in die nuwe vrystelling nie, maar het ook self die liedjie geskryf en vervaardig. “Daar is nog nie baie Afrikaanse liedjies in hierdie styl nie en dit gaan jou laat dans soos jy nog nooit gedans het nie,” verklap Stephan. Moenie Ophou, is enig in sy soort.
Kyk die musiekvideo hier:
Die meisies duo MWAH, wat bekend is vir hulle voel-goed musiek, het hulle unieke klank en smaak ook na die liedjie toe gebring. Franzel vertel op haar beurt: “Toe ons begin werk het saam met Stephantasties, het ons dadelik geweet hier kom iets anders.” Hulle vorige “colab” is ’n reuse sukses en het al oor die 2.5 miljoen trefslae op YouTube.
“Hierdie liedjie is ’n lekker saam sing en dans liedjie en ek glo die #Mwahsters sal saam met my stem,” sê Loriska met baie opgewondenheid oor die liedjie.
Moenie Ophou is ook ’n aptytwekker van wat verwag kan word van Stephantasties se debuut-album wat einde September beskikbaar sal wees, en definitief iets om na uit te sien.
Stephantasties se album, Pret, word Vrydag 28 September by Weiveld in Pretoria vrygestel. Kaartjies vir die geleentheid is beskikbaar aanlyn by www.ticketpros.co.za of by die deur.
