Cordelia se splinternuwe enkelsnit, Wees Lief is een waar sy die siel agter haar sang in pragtige eenvoud blootlê – ’n diepgaande boodskap in ’n aangrypende mooi musikale pakkie versier!
Die hart van hierdie snit is iets wat al ’n geruime tyd binne Cordelia klop: “Ek wil nog altyd meer as net sing en optree. Ek wil ’n verskil maak”, sê sy. “Die tipe verskil wat mense inspireer om hoop en liefde in alle omstandighede te kies en te lééf.”
Die snit groei van aanvanklik akoestiese snaarklanke en stem, tot die byvoeging van ’n sterk bas- en simfonielyn, tot vol harmonieë en orkes met trom en selfs techno-elemente.
Nes die musiekvideo ten toon stel, werp dit ’n blik op die verskillende nuanses van liefde – van vriendskap, gesins- en familie liefde tot die onbreekbare band van jarelange, Godgegewe liefde tussen man en vrou.
Kyk die musiekvideo hier:
Dit sing van ’n liefde wat verstaan, bly staan, saam staan deur alles, ander opbeur en red uit hulle donkerste tye met ’n “water van liefde”.
“Dit gaan oor ’n liefde wat op ’n amper kinderlik eenvoudige manier enige uitdaging, hoe kompleks ookal, te bowe kan kom”, sluit Cordelia af. “Dit gaan oor liefde vir jouself en liefde vir jou naaste wat uiteindlik uiting kry in goeie dade. Dade wat die lewens van ander ten goede te verander, en hulle weer op hul beurt te help om lief te hê.”
Cordelia is ook later vanjaar in aksie by Krone 5 in Pretoria en Kaapstad.